வெப்பம் வாட்டும் வேலூரில் இடியுடன் பலத்த மழை

வெப்பம் அதிகமாக வாட்டும் வேலூர் மாநகரில் வெள்ளிக்கிழமை நள்ளிரவு தொடங்கி அதிகாலை வரை பலத்த மழை பெய்தது. இதில் நகரின் பெரும்பாலான சாலைகள், தெருக்களில் தண்ணீர் தேங்கியது.

வெள்ளிக்கிழமை காலை முதலே வழக்கத்தை விட அதிகமாக வெயிலின் தாக்கம் இருந்தது. இந்நிலையில் நள்ளிரவுக்கு பிறகு லேசான மழை பெய்யத் தொடங்கியது. அதை தொடர்ந்து பலத்த மின்னல், இடியுடன் பலத்த மழை பெய்யத் தொடங்கியது. சுமார் 2 மணி நேரம் நீடித்த இந்த மழையால் நகரில் பெரும்பாலான தெருக்களில் தண்ணீர் புரண்டோடியது.

வேலூர் புதிய பேருந்து நிலையம், பேலஸ் கபே சந்திப்பு, காந்தி சாலை திருப்பம் உள்ளிட்ட இடங்களில் தண்ணீர் தேங்கியது.

இதேபோல் மாவட்டத்தில் ஆம்பூர், வாணியம்பாடி, ஆலங்காயம், காவேரிபாக்கம், குடியாத்தம் உள்ளிட்ட இடங்களிலும் பலத்த மழை பெய்தது. இதில் கிராமப் பகுதிகளில்  ஏராளமான வாழை மரங்கள் சரிந்து விழுந்து பாதிப்பு ஏற்பட்டுள்ளதாக விவசாயிகள் தெரிவித்தனர்.

மாவட்டத்தில் சனிக்கிழமை காலை 8 மணி வரையிலான கடந்த 24 மணி நேரத்தில் பெய்த மழை விவரம் (மி.மீட்டரில்):

வேலூர் 57, ஆம்பூர் 52.6, வாணியம்பாடி 40, ஆலங்காயம் 33.8, காவேரிபாக்கம் 36.6, வாலாஜா 25, சோளிங்கர் 16, திருப்பத்தூர் 11.2, ஆற்காடு 46, குடியாத்தம் 59.2, மேல்ஆலத்தூர் 39.4.