டெங்கு பாதிப்பு அதிகரிப்பு: அமைச்சர் விஜயபாஸ்கரை நீக்க மு.க.ஸ்டாலின் கோரிக்கை

தமிழகத்தில் டெங்கு பாதிப்பு அதிகரித்து வருவதால் சுகாதாரத் துறைக்கு வேறு அமைச்சரை நியமிக்க வேண்டும் என்று திமுக செயல்தலைவர் மு.க.ஸ்டாலின் வலியுறுத்தியுள்ளார்.
இது தொடர்பாக செவ்வாய்க்கிழமை அவர் வெளியிட்ட அறிக்கை: தமிழகத்தில் டெங்கு பாதிப்பு அதிகமாக உள்ளது என்பதை தில்லியில் பேட்டியளித்த சுகாதாரத் துறைச் செயலாளர் ஜெ.ராதாகிருஷ்ணன் பகிரங்கமாக ஒப்புக் கொண்டுள்ளார். தமிழகத்தில் டெங்கு கட்டுப்பாட்டில் இருக்கிறது என்று சட்டப்பேரவையில் சுகாதாரத் துறை அமைச்சர் விஜயபாஸ்கர் அளித்த வாக்குறுதி பொய் என்பது இந்தப் பேட்டி மூலம் நிரூபிக்கப்பட்டுள்ளது.
தமிழகத்தில் 5 ஆயிரத்துக்கும் மேற்பட்டோர் டெங்கு காய்ச்சலால் பாதிக்கப்பட்டுள்ளனர். சென்னை, திருவள்ளூர், காஞ்சிபுரம், கோவை, சேலம் உள்ளிட்ட 13-க்கும் மேற்பட்ட மாவட்ட மக்கள் டெங்கு காய்ச்சல் குறித்து பீதியடைந்துள்ளனர்.
எனவே, சுகாதாரத் துறைக்கு வேறு அமைச்சரை நியமிக்க வேண்டும். டெங்கு காய்ச்சலுக்கான தடுப்பு நடவடிக்கைகளையும் முன்னெச்சரிக்கை நடவடிக்கைகளையும் முதல்வரே முன்னின்று, அரசு அதிகாரிகளுடன் ஆலோசனை நடத்தி, பாதிப்பை முற்றிலும் நீக்க வேண்டும்.