இந்திய கம்யூனிஸ்ட் கட்சியின் மூத்த தலைவர் நல்லகண்ணுவிடம் வாழ்த்து பெற்ற மு.க.ஸ்டாலின், துரைமுருகன்

இந்திய கம்யூனிஸ்ட் கட்சியின் மூத்த தலைவர் நல்லகண்ணுவை திமுக தலைவர் மு.க.ஸ்டாலின் சந்தித்து வாழ்த்து பெற்றார். 

சென்னையில் நேற்று முன்தினம் நடைபெற்ற திமுக பொதுக்குழுவில் கட்சியின் தலைவராக மு.க.ஸ்டாலினும், பொருளாளராக துரைமுருகனும் ஒருமனதாக தேர்வு செய்யப்பட்டனர். இதையடுத்து ஸ்டாலினுக்கு பல்வேறு அரசியல் கட்சித் தலைவர்கள் வாழ்த்துகளைத் தெரிவித்து வருகின்றனர். 

இந்நிலையில் சென்னை சிஐடி நகரில் இந்திய கம்யூனிஸ்ட் கட்சியின் மூத்த தலைவர் நல்லகண்ணுவை திமுக தலைவர் மு.க.ஸ்டாலின் இன்று நேரில் சந்தித்து வாழ்த்து பெற்றார். அப்போது நல்லகண்ணு உடல்நிலை குறித்தும் அவர் கேட்டறிந்தார். மு.க.ஸ்டாலினுடன் துரைமுருகனும் உடன் சென்றார். 

முன்னதாக மு.க.ஸ்டாலின் நேற்று மார்க்சிஸ்ட் கம்யூனிஸ்ட் கட்சியின் மூத்த தலைவர் சங்கரய்யாவை சந்தித்து வாழ்த்து பெற்றார் என்பது குறிப்பிடத்தக்கது.