கோத்தகிரியில் பூத்துக் குலுங்கும் குறிஞ்சி மலர்கள்

பனிரெண்டு ஆண்டுகளுக்கு ஒருமுறை பூக்கும் குறிஞ்சி மலர்கள் தற்போது கோத்தகிரி ரங்கசாமி மலையில் பூத்துக் குலுங்குவதால் மலைப் பகுதி இந்தப் பூக்களின் ஊதா நிறத்தால் ரம்மியமாகக் காட்சி அளிக்கிறது.
நீலகிரி மாவட்டத்தின் பல சிறப்புகளில் ஒன்றாக விளங்குகிறது குறிஞ்சி மலர்கள். மணி வடிவில் ஊதா நிறத்திலான குறிஞ்சி மலர்கள் நீலகிரி மாவட்டத்தின் பெரும்பாலான மலைகளில் இயற்கையாகவே வளர்ந்து காணப்படும் தாவரம் ஆகும். ஸ்ட்ரோ பிலாந்தஸ் என்ற தாவரவியல் பெயர் கொண்ட இந்தத் தாவரம் ஓராண்டு இடைவெளி முதல் 12 ஆண்டுகளுக்கு ஒருமுறை பூக்கக் கூடியது. ஆசியக் கண்டத்தில் காணப்படும் 150 வகை குறிஞ்சி மலர் வகைகளும் இந்தியாவில் உள்ளதாக கண்டறியப்பட்டுள்ளது.
நீலகிரி மாவட்டத்தில் மட்டும் 30 வகையான குறிஞ்சி மலர்கள் உள்ளன. தற்போது கோத்தகிரியை அடுத்த ரங்கசாமி மலைச் சரிவுகளில் குறிஞ்சி மலர்கள் பூத்து ரம்மியமாகக் காட்சி அளிக்கின்றன. இந்த மலர்களில் தேன் அதிகமாக இருப்பதால் அதை தேனீக்கள் சேகரிக்கத் தொடங்கி உள்ளன. பழங்குடியினரான இருளர், குரும்பர் இன மக்கள் தேன் கூட்டிலிருந்து தேன் சேகரிப்பில் ஈடுபடுவர். 
உதகையிலிருந்து சுமார் 45 கி.மீ. தொலைவு பயணித்தால் இந்த மலைப் பகுதியை அடையலாம். இதற்கு வனத் துறை அனுமதி பெற வேண்டும். தற்போது பூத்துக் குலுங்கும் குறிஞ்சி மலர்கள் 12 ஆண்டுகளுக்கு ஒரு முறை பூக்கக் கூடிய வகையைச் சேர்ந்தது என்பது குறிப்பிடத்தக்கது.