நிர்மலாதேவியிடம் குரல் மாதிரி பரிசோதனை: போலீஸாருக்கு நீதிமன்றம் அனுமதி

கல்லூரி மாணவிகளிடம் பாலியல் பேரத்தில் ஈடுபட்டதாக கைது செய்யப்பட்டுள்ள அருப்புக்கோட்டை தனியார் கல்லூரி உதவிப் பேராசிரியை நிர்மலாதேவியிடம் குரல் மாதிரி பரிசோதனையை மதுரை சிறையில் எடுத்து கொள்ளலாம் என, சிபிசிஐடி போலீஸாருக்கு விருதுநகர் குற்றவியல் நீதிமன்றம் வியாழக்கிழமை அனுமதியளித்தது.
பாலியல் பேர விவகாரத்தில், மதுரை மத்திய சிறையில் அடைக்கப்பட்டுள்ள நிர்மலா தேவியை, விருதுநகர் குற்றவியல் நீதிமன்றத்தில் போலீஸார் வியாழக்கிழமை ஆஜர்படுத்தினர். ஏற்கெனவே, நிர்மலாதேவியின் குரல் மாதிரி பரிசோதனையை மயிலாப்பூரில் உள்ள தடய அறிவியல் துறையில் எடுக்க அனுமதி வழங்க வேண்டும் என சிபிசிஐடி துணை காவல் கண்காணிப்பாளர் கருப்பையா புதன்கிழமை மனுதாக்கல் செய்திருந்தார். இந்த மனு மீது வியாழக்கிழமை விசாரணை மேற்கொண்ட விருதுநகர் குற்றவியல் நீதிமன்ற நீதிபதி திலகேஸ்வரி, மதுரை மத்திய சிறையில் வைத்து நிர்மலாதேவியிடம் குரல் மாதிரி பரிசோதனையை எடுத்து கொள்ள அனுமதி வழங்கினார். இது சாத்தியமில்லை என கருதினால் மேல்முறையீடோ, மறுபரிசீலனை செய்யவோ மீண்டும் மனுதாக்கல் செய்யலாம் எனவும் நீதிபதி தெரிவித்தார்.
இதைத்தொடர்ந்து நிர்மலாதேவியின் நீதிமன்றக் காவலை வரும் 21 -ஆம் தேதி வரை நீட்டித்து நீதிபதி உத்தரவிட்டார். இதையடுத்து நிர்மலாதேவியை போலீஸார் மீண்டும் மதுரை மத்திய சிறைக்கு அழைத்துச் சென்றனர்.