அதிமுக அலுவலகத்தில் முதல்வர் -துணை முதல்வர் ஆலோசனை

அதிமுக தலைமை அலுவலகத்தில் முதல்வர் பழனிசாமி, துணை முதல்வர் ஓ.பன்னீர்செல்வம் ஆகியோர் தலைமையில் வியாழக்கிழமை ஆலோசனைக் கூட்டம் நடைபெற்றது.
இக்கூட்டத்தில் வரும் 30-ஆம் தேதி சென்னையில் நடைபெறும் எம்.ஜி.ஆர். நூற்றாண்டு விழாக் கொண்டாட்டம் உள்ளிட்ட முக்கிய விஷயங்கள் குறித்து விவாதிக்கப்பட்டன. சென்னை ராயப்பேட்டையில் உள்ள அதிமுக தலைமை அலுவலகத்துக்கு முதல்வர் எடப்பாடி கே.பழனிசாமி, துணை முதல்வர் 
ஓ.பன்னீர்செல்வம், அமைச்சர்கள் தங்கமணி, எஸ்.பி.வேலுமணி, டி.ஜெயக்குமார், அதிமுக துணை ஒருங்கிணைப்பாளர்கள் கே.பி.முனுசாமி, வைத்திலிங்கம் உள்ளிட்டோர் மாலை 6.30 மணியளவில் வந்தனர்.
அகில இந்தியத் தலைவர்கள்: எம்.ஜி.ஆர். நூற்றாண்டு விழா தமிழகத்தின் அனைத்து மாவட்டங்களிலும் நடைபெற்றது. இந்த விழாக்களில் முதல்வர், துணை முதல்வர், அமைச்சர்கள் பங்கேற்றனர். இதையடுத்து, சென்னையில் எம்.ஜி.ஆர். நூற்றாண்டுக் கொண்டாட்டத்தின் இறுதி விழாவை நடத்த ஏற்பாடுகள் நடந்து வருகின்றன.
இதையொட்டி, சென்னை கடற்கரை சாலையில் நூற்றாண்டு வளைவு திறக்கப்பட இருக்கிறது. மேலும், நந்தனம் ஒய்.எம்.சி.ஏ. மைதானத்தில் விழாவுக்காக மிகப்பெரிய அளவில் ஏற்பாடுகள் செய்யப்பட்டு வருகின்றன. இந்த விழாவுக்கு அகில இந்தியத் தலைவர்களை அழைப்பது தொடர்பாக ஆலோசனை நடத்த அதிமுக தலைமை அலுவலகத்தில் வியாழக்கிழமை கூட்டம் நடைபெற்றது. அகில இந்திய அளவில் எந்தெந்த கட்சிகளின் தலைவர்களை அழைப்பது என்பது உள்ளிட்ட பல முக்கிய விஷயங்கள் குறித்து விவாதிக்கப்பட்டதாகத் தெரிகிறது.
கட்சிப் பதவிகள்: அதிமுக அமைப்பு ரீதியாகச் செயல்படும் மாவட்டங்களில் காலியாக உள்ள கட்சிப் பதவியிடங்களை நிரப்புவது தொடர்பாக விவாதிக்கப்பட்டதாகத் தகவல்கள் தெரிவிக்கின்றன.