தேர்தல் பிரசாரம்: பிரதமர் மோடி இன்று தமிழகம் வருகை!

கோவை, திருப்பூர், பொள்ளாச்சி, நீலகிரி ஆகிய 4 மக்களவைத் தொகுதிகளில் போட்டியிடும் பாஜக மற்றும் அதிமுக வேட்பாளர்களை ஆதரித்து பிரதமர் நரேந்திர மோடி இன்று கோவையில் நடைபெறும் பொதுக்கூட்டத்தில் பேசுகிறார். 

17-வது மக்களவைக்கு தமிழகம் மற்றும் புதுச்சேரியில் வாக்குப்பதிவுக்கு இன்னும் 9 நாட்களே உள்ள நிலையில், ஏற்கனவே, தமிழகத்தில் பிரதமர் மோடி, காங்கிரஸ் தலைவா் ராகுல் காந்தி இருவருமே தங்களது முதல்கட்ட பிரசாரத்தை முடித்துள்ளனர். 

இந்நிலையில், அடுத்தக்கட்ட பிரசாரமாக கோவை மக்களவைத் தொகுதி பாஜக வேட்பாளா் சி.பி.ராதாகிருஷ்ணனை ஆதரித்து இன்று மாலை கோவை கொடிசியா மைதானத்தில் நடைபெறும் பொதுக்கூட்டத்தில் கலந்துகொள்வதற்காக பிரதமர் நரேந்திர மோடி இன்று மாலை கோவை வருகிறார். 

பொதுக்கூட்டத்தில் பங்கேற்ப்பதற்காக பிரதமர் இன்று மாலை 6.30 மணியளவில் தனி விமானம் மூலம் கோவை வருகிறார். அவரை தமிழக முதல்வர் எடப்பாடி பழனிசாமி வரவேற்று பொதுக்கூட்டத்திற்கு அழைத்து வருகிறார்.

மோடியின் பிரசார பொதுக்கூட்டத்தில் துணை முதல்வர் பன்னீர்செல்வம், தேமுதிக பொருளாளர் பிரேமலதா, தமாகா தலைவர் வாசன், சமத்துவ கட்சி தலைவர் சரத்குமார், கொமுக தலைவர் பெஸ்ட் ராமசாமி, தமிழ்நாடு கொங்கு இளைஞர் பேரவை தலைவர் தனியரசு, பாமக நிர்வாகிகள் உள்ளிட்ட கூட்டணி கட்சி தலைவர்கள் பங்கேற்கின்றனர். 

பாஜக மற்றும் கூட்டணிக் கட்சி வேட்பாளர்களை ஆதரித்து பேசும் மோடி பிரசாரத்தை முடித்துக்கொண்டு இரவு 8.45 மணியளவில், தனி விமானத்தில் தில்லி திரும்புகிறார்.

பிரதமர் மோடி வருகையை முன்னிட்டு, கோவை விமான நிலையத்தில் இருந்து, கொடிசியா மைதானம் வரை போலீஸ் பாதுகாப்பு வளையத்திற்குள் கொண்டு வரப்பட்டுள்ளது. கோவை, திருப்பூர், ஈரோடு உட்பட பல்வேறு பகுதிகளை சேர்ந்த 3 ஆயிரத்துக்கு மேற்பட்ட போலீஸார் பாதுகாப்பு பணியில் ஈடுபடுத்தப்பட்டுள்ளனர். 

கோவை பிரசாரத்தை தொடர்ந்து தேனி மக்களவைத் தொகுதி அதிமுக வேட்பாளரும், துனை முதல்வர் பன்னீர்செல்வத்தின் மகனுமான ரவீந்திரநாத்தை ஆதரித்து வருகின்ற 13 ஆம் தேதி மோடி பிரசாரம் மேற்கொள்கிறார். 12 ஆம் தேதி காங்கிரஸ் வேட்பாளர் ஈவிகேஎஸ் இளங்கோவனை ஆதரித்து காங்கிரஸ் கட்சி தேசியத் தலைவா் ராகுல் காந்தி தேனியில் பிரசாரம் செய்கிறார். 

தேசியத் தலைவர்களின் தொடர் வருகையால் தமிழகத்தில் தோ்தல் சூடுபிடிக்கத் துவங்கியுள்ளது.