தமிழகத்தில் திமுக அலை வீசவில்லை; சுனாமி வீசுகிறது: திமுக தலைவர் முக ஸ்டாலின் பேச்சு

கோவை: தமிழகத்தில் திமுகவில் அலை வீசவில்லை; சுனாமி வீசுவதாக திமுக தலைவர் ஸ்டாலின் மேட்டுப்பாளையத்தில் பிரசாரத்தில் பேசினார்.

கோவை மற்றும் நீலகிரி மாவட்டத்தில் உள்ள உதகை காங்கிரஸ் வேட்பாளர் கணேசன், கூடலூர் திமுக வேட்பாளர் காசி லிங்கம், குன்னூர் திமுக வேட்பாளர் ராமசந்திரன், மேட்டுப்பாளையம் திமுக வேட்பாளர் டி.ஆர். சண்முகசுந்தரம் ஆகியோரை ஆதரித்து திமுக தலைவர் மு‌.க.ஸ்டாலின் மேட்டுப்பாளையம் பேருந்து நிலையத்தில் வியாழக்கிழமை பிரசாரத்தில் ஈடுபட்டார்.

அப்போது ஸ்டாலின் பேசியதாவது: தமிழக முதல்வர் ஹெலிகாப்டரில் பிரசாரத்திற்கு வருகிறார். இதே முதல்வர் நீலகிரியில் நிலச்சரிவு ஏற்பட்ட போது ஹெலிகாப்டரில் வந்து பார்வையிட்டாரா?. நான் சென்று பார்வையிட்டேன். திமுக சார்பில் ரூ.10 கோடி நிதி வழங்கப்பட்டது. திமுகவை பெருவாரியான வாக்கு வித்தியாசத்தில் வெற்றி பெற செய்ய வேண்டும். இப்போது ஒரு வார காலமாக கருத்துகணிப்புகள் வந்து கொண்டிருக்கிறது. எல்லா கருத்துகணிப்புகளிலும் திமுக அணி தான் வெற்றி பெற போகிறது என வந்துள்ளது. தொலைக்காட்சிகளில் திமுக வெற்றி பெறும் என வந்ததும் அந்த தொலைக்காட்சிகளை ஆளும் கட்சியினர் மிரட்டியுள்ளனர். அரசு கேபிளில் கட் செய்துள்ளனர்.

முதல் முதலாக தேர்தல் பிரசாரத்தில் ஈடுபட்ட போது 200 தொகுதிகளில் வெற்றி என எண்ணியிருந்தேன். இப்போது பார்க்கையில் 234 தொகுதிகளிலும் வெற்றி பெறுவோம் என நம்பிக்கை வந்துள்ளது. 

மக்களுக்கு நன்றாக தெரியும். இந்த அரசாங்கம் கொள்ளை அடித்த அரசாங்கம், ஊழல் செய்த அரசாங்கம், ஜல்லிக்கட்டு போராட்டத்தில் ஈடுபட்டவர்களை தாக்கிய அரசாங்கம், அரசு ஊழியர்கள் உள்பட அனைவரையும் போராட வைத்த அரசாங்கம். 

பொள்ளாத அரசாங்கம் என்பதற்கு பொள்ளாச்சியே சாட்சி. பிரதமர் மோடி திமுக ஆட்சியில் பெண்களுக்கு பாதுகாப்பு இல்லை என்கிறார். பொள்ளாச்சி நடைபெற்ற சம்பவத்தை நினைத்து பார்க்க வேண்டும். 400 பெண்களுக்கு மேல் பாலியல் வன்கொடுமைகள் செய்யப்பட்டுள்ளனர். இது அதிமுக ஆட்சியில் நடந்தது. இதை பிரதமர் மோடி தெரிந்து கொள்ள வேண்டும்.  நாடாளுமன்ற தேர்தலில் திமுக அமோக வெற்றி பெற்றது. தமிழகம் முழுவதும் திமுக அலை வீசவில்லை. சுனாமி வீசி வருகிறது.

ஒரே ஒரு அதிமுக எம்.பி ஒ.பி.எஸ் மகன் மட்டும் வெற்றி பெற்றார். அவர் பிஜேபி எம்பியாக செயல்படுகிறார். எனவே இந்த தேர்தலில் அதிமுக எம்.எல்.ஏ ஒருவர் கூட வெற்றி பெற கூடாது. அப்படி வெற்றி பெற்றால் அவர்கள் பி.ஜே.பி எம்.எல்.ஏ வாக செயல்படுவார்கள். 

மதுரைக்கு  வரும் பிரதமர் மோடியிடம் கேட்கிறேன். மதுரையில் எய்ம்ஸ் மருத்துமனை உள்ளதா என பிரதமர் மோடி போய் பார்க்க  வேண்டும். அதில் அடிக்கல் நாட்டிய செங்கலையும் உதயநிதி எடுத்துட்டு போயிட்டார். மதுரையில் பிரதமருடன் முதல்வர் பழனிசாமி இருப்பார். அவருக்கு நான்  கோரிக்கை வைக்கிறேன். சி.ஏ.ஏ, நீட் தேர்வு, மூன்று வேளாண் சட்டம் இதை நாங்கள் ஏற்கவில்லை. திரும்ப பெறுங்கள் என பிரதமரிடம் முதல்வர் கேட்க வேண்டும். 

அதே போல் 7 பேர் விடுதலை குறித்தும் பிரதமரிடம் கேட்க வேண்டும். பழனிசாமி அரசு பள்ளி மாணவர்களுக்கு 7.5 சதவீதம் இடஒதுக்கீடு வழங்கி உள்ளது. அதை எதிர்த்து உச்ச நீதிமன்றத்தில் மத்திய அரசு வழக்கு போட்டுள்ளது. மோடியை பார்த்து குனிந்தாவது கேட்கனும் இதை வாபஸ் பெறுங்கள் என்று. இப்படி முடிவு எடுக்க தைரியம் இல்லாத, வக்கு இல்லாத முதல்வரை தோற்கடிக்க வேண்டும்.

அதிமுக ஆட்சியில் விலை வாசி உயர்வு மிகவும் அதிகமாக அதிகரித்துள்ளது. விலை வாசிகளை கட்டுப்படுத்த தமிழகம் வளர்ச்சிக்கு திமுக தேர்தல் அறிக்கை வெளியிட்டுள்ளது.  

நீலகிரி மாவட்டத்தில் இருந்த உருளைகிழங்கு ஆராய்ச்சி மையம் குஜராத்திற்கு மாற்றப்பட்டுள்ளது. அது மீண்டும் நீலகிரி மாவட்டத்தில் அமைக்கப்படும். குன்னூரில் அரசு கலை கல்லூரி, பச்சை தேயிலைக்கு ஆதரவிலை,  கட்டுமான வளர்ச்சிக்கு மாஸ்டர் பிளான் தடை சட்டம் அமல்படுத்தப்படும். அரசு மருத்துவமனைகக் நவீனப்படுத்தப்படும். சுற்றுலா மேம்படுத்தப்படும். இது போன்று பல்வேறு திட்டங்கள் செயல்படுத்தப்படும். 

அதேபோல் மேட்டுப்பாளையத்தில் வாழை ஆராய்ச்சி மையம், அரசு மருத்துவமனை நவீனப்படுத்தப்படும். மாநில உரிமைகளை காக்க, சுயமரியாதை காக்க திமுக வெற்றி பெற வேண்டும் என ஸ்டாலின் பேசினார்.  இவருடன் கட்சியின் முக்கிய நிர்வாகிகள் பலர் கலந்து கொண்டனர்.