உள்ளார்ந்த அன்புடன் பழகிடும் நண்பர்: ரஜினிக்கு தமிழக முதல்வர் புகழாரம்

தமிழ் சினிமாவின் உச்ச நட்சத்திரமான ரஜினிகாந்தின் பிறந்தநாள், அவரின் ரசிகர்களால் கொண்டாடப்பட்டுவருகிறது. இந்நிலையில், அவருக்கு வாழ்த்து தெரிவித்த தமிழக முதல்வரும் திமுக தலைவருமான ஸ்டாலின், "உள்ளார்ந்த அன்புடன் பழகிடும் இனிய நண்பர் சூப்பர் ஸ்டார் ரஜினிகாந்துக்கு பிறந்தநாள் நல்வாழ்த்துகள்!

72-ஆவது அகவையில் அடியெடுத்து வைக்கும் அவர், இன்னும் பல ஆண்டுகள் தமிழ் மக்களைத் தன்னிகரற்ற தனது திரையாளுமையால் மகிழ்விக்கவும்; நல்ல உடல்நலத்துடன் திகழவும் விழைகிறேன்" என குறிப்பிட்டுள்ளார்.

ரஜினிகாந்துக்கு வாழ்த்து தெரிவித்த எதிர்க்கட்சி தலைவரும் முன்னாள் முதல்வருமான எடப்பாடி பழனிசாமி, "ரஜினிகாந்த்
நீண்ட ஆயுளுடன், ஆரோக்கியமான வாழ்வு வாழ எனது நெஞ்சம் நிறைந்த பிறந்தநாள் நல்வாழ்த்துக்களை தெரிவித்துக் கொள்கிறேன்" எனக் குறிப்பிட்டுள்ளார்.

முன்னாள் முதல்வரும் அஇஅதிமுகவின் ஒருங்கிணைப்பாளருமான ஓ. பன்னீர்செல்வம் தனது ட்விட்டர் பக்கத்தில், "அன்புச்சகோதரர் திரு.ரஜினிகாந்த்க்கு எனது இனிய பிறந்தநாள் நல்வாழ்த்துகளை அன்போடு தெரிவித்துக் கொள்கிறேன். ரஜினிகாந்த் நல்ல ஆரோக்கியத்துடன் பல்லாண்டுகள் வாழ்ந்து உயர்ந்திட இறைவனை இறைஞ்சுகிறேன்" என பதிவிட்டுள்ளார்.