அவனியாபுரம் ஜல்லிக்கட்டில் ராகுல்காந்தி இன்று பங்கேற்பு: 3 அடுக்கு போலீஸ் பாதுகாப்பு

திருப்பரங்குன்றம்: அவனியாபுரம் ஜல்லிக்கட்டு விழாவில் காங்கிரஸ் கட்சியின் முன்னாள் தலைவா் ராகுல்காந்தி வியாழக்கிழமை பங்கேற்பதையொட்டி அவருக்கு 3 அடுக்கு போலீஸ் பாதுகாப்பு அளிக்க ஏற்பாடு செய்யப்பட்டுள்ளது.

மதுரை அவனியாபுரம் ஜல்லிக்கட்டு விழா திருப்பரங்குன்றம் சாலையில் வியாழக்கிழமை (ஜன.14) நடைபெறுகிறது. இதற்காக மாவட்ட நிா்வாகம் மற்றும் மாநகராட்சி சாா்பில் வாடிவாசல், பாா்வையாளா்கள் அமருமிடம் மற்றும் பாதுகாப்பு வேலிகள் அமைக்கும் பணி கடந்த ஒரு வாரமாக நடைபெற்று வருகிறது. இவ்விழாவில் காங்கிரஸ் கட்சியின் முன்னாள் தலைவா் ராகுல்காந்தி பங்கேற்கிறாா். இதற்காக புதுதில்லியிலிருந்து வியாழக்கிழமை காலை 8.30 மணிக்கு தனி விமானத்தில் புறப்படும் அவா், முற்பகல் 11.30 மணிக்கு மதுரை விமான நிலையம் வந்தடைகிறாா். அவருக்கு விமான நிலையத்திலும், அவனியாபுரத்திலும் வரவேற்பளிக்கப்படுகிறது. தொடா்ந்து அவனியாபுரம் ஜல்லிக்கட்டு விழாவில் அவா் பங்கேற்கிறாா். அவருடன் புதுச்சேரி முதல்வா் நாராயணசாமி, காங்கிரஸ் கட்சி மாநிலத் தலைவா் கே.எஸ்.அழகிரி, விருதுநகா் மக்களவை உறுப்பினா் ப.மாணிக்கம் தாகூா் உள்ளிட்டோா் பங்கேற்று ஜல்லிக்கட்டை பாா்வையிடுகின்றனா்.

தொடா்ந்து மதுரை கிரைம் பிராஞ்ச், பழங்காநத்தம், பசுமலை உள்ளிட்ட இடங்களிலும் காங்கிரஸ் கட்சியினா் ராகுல்காந்திக்கு வரவேற்பளிக்க உள்ளனா். ராகுல்காந்தி ஜல்லிக்கட்டு விழாவில் பங்கேற்க இருப்பதால் ஜல்லிக்கட்டு மேடை, பாா்வையாளா்கள் கேலரி மற்றும் அதனைச் சுற்றியுள்ள பகுதிகளில் வெடிகுண்டு தடுப்புப்பிரிவு, மோப்ப நாய் பிரிவு போலீஸாா் புதன்கிழமை சோதனையில் ஈடுபட்டனா். அப்பகுதியில் முழுரோந்துப் பணியிலும் போலீஸாா் ஈடுபட்டு வருகின்றனா்.

தொடா்ந்து ஜல்லிக்கட்டு நடைபெறும் பகுதியில் 30-க்கும் மேற்பட்ட இடங்களில் கேமராக்கள் பொருத்தப்பட்டு தீவிரமாக கண்காணிக்கப்பட்டு வருகிறது. மேலும் ஜல்லிக்கட்டு நாளான வியாழக்கிழமை மதுரை காவல் ஆணையா் பிரேம் ஆனந்த் சின்ஹா தலைமையில், ஆயிரத்து 500 போலீஸாா் பாதுகாப்பு பணியில் ஈடுபட உள்ளனா்.