திமுக எம்.எல்.ஏ.க்கள் கூட்டத்தில், முதல்வர் மு.க.ஸ்டாலின் உறுப்பினர்களுக்கு அறிவுரை வழங்கியதாக உதயநிதி ஸ்டாலின் தெரிவித்தார்.
தமிழக அரசின் 16வது சட்டப்பேரவைக் கூட்டத்தொடர் ஆளுநர் பன்வாரிலால் புரோஹித் உரையுடன் இன்று தொடங்கியது. இந்தக் கூட்டம் வரும் வியாழக்கிழமை வரை நடைபெறவுள்ளது.
இந்நிலையில், அண்ணா அறிவாலயத்தில், திமுக சார்பில் சட்டப்பேரவைக்கு தேர்ந்தெடுக்கப்பட்ட உறுப்பினர்களுடன் முதல்வர் மு.க.ஸ்டாலின் ஆலோசனை நடத்தினார்.
இந்த கூட்டத்தில் பங்கேற்ற பேரவை உறுப்பினரும், திமுக இளைஞரணி செயலாளருமான உதயநிதி ஸ்டாலின் வெளியிட்ட டிவிட்டர் பதிவில் கூறியதாவது,
16-வது சட்டப்பேரவையின் முதல் கூட்டத்தொடர் தொடங்கிய நிலையில் முதலமைச்சர் மு.க.ஸ்டாலின் தலைமையில் அறிவாலயத்தில் நடைபெற்ற திமுக எம்.எல்.ஏ.க்கள் கூட்டத்தில் பங்கேற்றேன். பேரவையில் கண்ணியத்தோடும்-கட்டுப்பாட்டோடும் கடைமையாற்ற திமுக தலைவர்-முதல்வர் அறிவுரைகளை வழங்கினார்கள் எனத் தெரிவித்துள்ளார்.