குறிஞ்சிப்பாடி அதிமுக வேட்பாளர் மாற்றம்

குறிஞ்சிப்பாடி தொகுதி அதிமுக வேட்பாளர் மாற்றம் செய்து அதிமுகவிலிருந்து அறிவிப்பு வெளியாகியுள்ளது. 
இதுகுறித்து அதிமுக ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி கூட்டாக வெளியிட்ட அறிக்கையில், அதிமுக ஆட்சி மன்றக் குழு பரிசீலித்து எடுத்த முடிவின்படி, 6ஆம் தேதி நடைபெற உள்ள தமிழ்நாடு சட்டப்பேரவை பொதுத்தேர்தலில், கடலூர் மத்திய மாவட்டம் குறிஞ்சிப்பாடி சட்டப்பேரவைத் தொகுதிக்கு, ஏற்கெனவே அறிவிக்கப்பட்டிருந்த வேட்பாளருக்கு பதிலாக அதிமுகவின் அதிகாரபூர்வ வேட்பாளராக இராமஜெயம் தேர்ந்தெடுக்கப்பட்டு நிறுத்தப்படுகிறார் என்பதைத் தெரிவித்துக்கொள்கிறோம். இவ்வாறு அதில் குறிப்பிட்டுள்ளனர். 
இதன்மூலம் குறிஞ்சிப்பாடி தொகுதிக்கு ஏற்கெனவே அறிவிக்கப்பட்ட அதிமுக வேட்பாளர் ராம பழனிசாமி மாற்றம் செய்யப்பட்டுள்ளார். இதைத்தொடர்ந்து சட்டப்பேரவைத் தேர்தலில் அதிமுக சார்பில் போட்டியிடும் பெண் வேட்பாளர்களின் எண்ணிக்கை 15ஆக உயர்ந்துள்ளது.