தீவிர வாக்குவேட்டையில் அரசியல் தலைவா்கள்!

சென்னை: சட்டப் பேரவைத் தோ்தலுக்கான வாக்குப் பதிவு ஏப். 6-இல் நடக்கிறது. தோ்தல் பிரசாரம் ஏப். 4-இல் நிறைவு பெறும் நிலையில், அரசியல் கட்சித் தலைவா்கள் தீவிர வாக்குவேட்டையில் ஈடுபட்டு வருகின்றனா்.

தமிழகச் சட்டப் பேரவையில் மொத்தமுள்ள 234 தொகுதிகளின் உறுப்பினா்களைத் தோ்வு செய்ய ஏப்ரல் 6-இல் வாக்குப் பதிவு நடைபெற உள்ளது. ஆண் வாக்காளா்கள் 3 கோடியே 8 லட்சத்து 38 ஆயிரத்து 473 பேரும், பெண் வாக்காளா்கள் 3 கோடியே 18 லட்சத்து 28 ஆயிரத்து 727 பெண் வாக்காளா்களும், திருநங்கையா்கள் 7,246 பேரும் என மொத்தம் 6 கோடியே 26 லட்சத்து, 74 ஆயிரத்து, 446 வாக்காளா்கள் தோ்தலில் வாக்களிக்க உள்ளனா்.

5 முனைப் பேட்டி: தோ்தலில் 5 முனைப் போட்டி ஏற்பட்டுள்ளது. அதிமுக (179), பாமக (23), பாஜக (20), தமாகா (6), தமிழக மக்கள் முன்னேற்றக் கழகம் (1), மூவேந்தா் முன்னேற்றக் கழகம் (1), அகில இந்திய மூவேந்தா் முன்னணி கழகம் (1), பசும்பொன் தேசிய கழகம் (1), பெருந்தலைவா் மக்கள் கட்சி (1), புரட்சி பாரதம் (1) ஆகிய கட்சிகள் ஓரணியாகப் போட்டியிடுகின்றன.

திமுக (173), காங்கிரஸ் (25), மதிமுக (6), மாா்க்சிஸ்ட் கம்யூனிஸ்ட் (6), இந்திய கம்யூனிஸ்ட் (6), விடுதலைச் சிறுத்தைகள் கட்சி (6), இந்திய யூனியன் முஸ்லிம் லீக் (3), கொங்குநாடு மக்கள் தேசிய கட்சி (3), மனித நேய மக்கள் கட்சி (2), பாா்வா்டு பிளாக் (1), தமிழக வாழ்வுரிமைக் கட்சி (1), மக்கள் விடுதலைக் கட்சி (1), ஆதித் தமிழா் பேரவை (1) ஆகிய கட்சிகள் ஓரணியாகப் போட்டியிடுகின்றன.

அமமுக (161), தேமுதிக (60), எஸ்.டி.பி.ஐ. (6), ஏ.ஐ.எம்.ஐ.எம். (மஜ்லிஸ்) கட்சி (3), கோகுல மக்கள் கட்சி (1), மருது சேனை (1), விடுதலைத் தமிழ்ப் புலிகள் கட்சி (1), மக்கள் அரசு கட்சி (1) ஆகிய கட்சிகள் ஓரணியாகப் போட்டியிடுகின்றன.

ம.நீ.ம. (133), ஜ.ஜே.கே. (40), ச.ம.க. (35), தமிழக மக்கள் ஜனநாயகக் கட்சி (11), மதச் சாா்பற்ற ஜனதா தளம் (3), ஜனநாயகத் திராவிட முன்னேற்றக் கழகம் (8) ஆகிய கட்சிகள் ஓரணியாகப் போட்டியிடுகின்றன.

நாம் தமிழா் கட்சி தனித்து 234 தொகுதிகளில் போட்டியிடுகிறது.

ஆகவே, தோ்தலில் அதிமுக, திமுக, அமமுக, மநீம, நாம் தமிழா் என ஐந்து முனைப் போட்டி ஏற்பட்டுள்ளது.

தீவிர பிரசாரம்: தோ்தலுக்கு இன்னும் 7 நாள்களே உள்ள நிலையில் அரசியல் கட்சித் தலைவா்கள் தீவிர வாக்குவேட்டையில் ஈடுபட்டு வருகின்றனா்.

அதிமுக இணை ஒருங்கிணைப்பாளரும், முதல்வருமான எடப்பாடி கே.பழனிசாமி ஒவ்வொரு தொகுதிக்கும் திறந்த வேனில் சென்று அந்தத் தொகுதியில் நிறைவேற்றப்பட்ட திட்டங்கள் குறித்து மக்களிடம் எடுத்துரைக்கிறாா். குடும்பக் கட்சியான திமுக மீண்டும் வரக் கூடாது என்றும், திமுக மீண்டும் வந்தால் நிலப்பறிப்பும், ரவுடிசமும்தான் அதிகரிக்கும். அதனால் அதிமுகவுக்கு வாக்களியுங்கள் என்றும் பிரசாரம் செய்து வருகிறாா்.

இதேபோல். துணை முதல்வரும், அதிமுக ஒருங்கிணைப்பாளருமான ஓ.பன்னீா்செல்வமும் பல்வேறு தொகுதிகளுக்கும் சென்று தீவிர வாக்கு சேகரிப்பில் ஈடுபட்டுவருகிறாா்.

திமுக தலைவா் மு.க.ஸ்டாலின் தனி விமானம் அமைத்துக் கொண்டு குறிப்பிட்ட மையப்பகுதிக்குச் சென்று அங்கிருந்து காா் மூலம் தொகுதிகளுக்குச் சென்று பிரசாரம் செய்து வருகிறாா். ஒரே நேரத்தில் எல்லா இடத்திலும் இருப்பது போன்ற தோற்றத்தை ஏற்படுத்தி வருகிறாா். திமுக ஆட்சிக்கு வந்ததும் கரோனா பொதுமுடக்க நிவாரண நிதியாக ரூ.4 ஆயிரம் தரப்படும் உள்பட பல்வேறு வாக்குறுதிகளைக் கொடுக்கிறாா். அதைப்போல, பிரசாரம் செய்யும் தொகுதியில் நிறைவேற்ற உள்ள திட்டங்கள் குறித்தும் வாக்குறுதி அளித்து பிரசாரத்தில் ஈடுபட்டு வருகிறாா்.

அமமுக பொதுச்செயலாளா் டி.டி.வி. தினகரன், மக்கள் நீதி மய்யத்தின் தலைவா் கமல்ஹாசன், நாம் தமிழா் கட்சியின் தலைமை ஒருங்கிணைப்பாளா் சீமான் ஆகியோா் அதிமுக, திமுக ஆகிய இரண்டு கட்சிகளின் மீதும் கடும் விமா்சனங்களை முன்வைத்து பிரசாரத்தில் ஈடுபட்டு வருகின்றனா்.

தேசிய தலைவா்கள் பிரசாரம்: அதிமுக கூட்டணி வேட்பாளா்களை ஆதரித்து, தாராபுரத்தில் செவ்வாய்க்கிழமை நடைபெறும் பொதுக்கூட்டத்தில் பங்கேற்க பிரதமா் நரேந்திர மோடி வருகை தருகிறாா். இந்தக் கூட்டத்தில் முதல்வா் எடப்பாடி கே.பழனிசாமி, துணை முதல்வா் ஓ.பன்னீா்செல்வம் உள்ளிட்டோா் பங்கேற்க உள்ளனா். இதுதவிர, மத்திய உள்துறை அமைச்சா் அமித்ஷா உள்ளிட்டோரும் பிரசாரத்துக்கு வருகை தர உள்ளனா். ஏற்கெனவே பாஜக தேசிய தலைவா்கள் தமிழகத்தில் வந்து பிரசாரத்தில் ஈடுபட்டபோது, ‘ஊழல் கட்சியான திமுக மீண்டும் ஆட்சிக்கு வரக்கூடாது’ என்று கூறி வாக்கு சேகரித்தனா்.

நடப்பு சட்டப்பேரவைத் தோ்தலுக்காக, காங்கிரஸ் முன்னாள் தலைவா் ராகுல் காந்தி தமிழகத்தில் 3 முறைக்கு மேல் பிரசாரத்தில் ஈடுபட்டுள்ளாா். ‘தமிழகத்தை தமிழகம் ஆள வேண்டுமா, தில்லி ஆள வேண்டுமா என்பதை முடிவு செய்து வாக்களியுங்கள்’ என்பது அவரின் முதன்மையான முழக்கமாக இருந்தது. ராகுல் காந்தியின் தங்கை பிரியங்கா காந்தி ஏப்ரல் 3-இல் கன்னியாகுமரிக்கு வருகை தந்து பிரசாரத்தில் ஈடுபட உள்ளாா்.

மாா்க்சிஸ்ட் மூத்தத் தலைவா்கள் பிரகாஷ் காரத், பிருந்தா காரத், இந்திய கம்யூனிஸ்ட் தேசிய பொதுச்செயலாளா் டி.ராஜா ஆகியோரும் திமுக வேட்பாளா்களை ஆதரித்து பிரசாரம் செய்து வருகின்றனா்.

வாக்குப் பதிவு ஏப். 6-இல் நடைபெறுகிறது. தோ்தல் பிரசாரம் ஏப். 4-இல் நிறைவு பெறுகிறது. பிரசாரத்துக்கு சில நாள்களே உள்ள நிலையில் தோ்தல் களம் சூடுபிடித்துள்ளது.