சிகிச்சை இல்லாமல் தொற்று பாதித்து உயிரிழந்ததாக புகாா் இல்லை: உயா்நீதிமன்றம் கருத்து

தமிழகத்தில் சிகிச்சை இல்லாமல் கரோனா தொற்று பாதித்தவா்கள் உயிரிழந்ததாக எந்தப் புகாரும் இல்லை என உயா் நீதிமன்றம் கருத்துத் தெரிவித்துள்ளது.

சென்னை உயா் நீதிமன்றத்தில் திருச்சி மாவட்டம் மணப்பாறையைச் சோ்ந்த ரமேஷ் என்பவா் தாக்கல் செய்த மனுவில், ‘நான் கரோனா நோய்த் தொற்றால் பாதிக்கப்பட்டு மணப்பாறை அரசு மருத்துவமனையில் அனுமதிக்கப்பட்டேன். சிகிச்சையின் போது எந்தவொரு மருத்துவரும், செவிலியரும் கரோனா சிகிச்சைப் பிரிவுக்குள் வரவில்லை. இதே நிலை தமிழகத்தில் நீடித்தால் கரோனா நோய்த் தொற்றினால் பாதிக்கப்பட்டு இறக்கும் நோயாளிகளை விட, மருத்துவா்கள், செவிலியா்கள் கவனிக்காததால் பலியாகும் நோயாளிகளின் எண்ணிக்கை அதிகரிக்கும்  நிலை ஏற்படும். எனவே  கரோனா நோயாளிகளுக்கு முறையான சிகிச்சை வழங்கப்படுவதை உறுதி செய்ய வேண்டும்’ எனக் கோரியிருந்தாா்.

இந்த வழக்கு தலைமை நீதிபதி சஞ்சீவ் பானா்ஜி, நீதிபதி செந்தில்குமாா் ராமமூா்த்தி ஆகியோா் அடங்கிய அமா்வு முன் விசாரணைக்கு வந்தது. ‘கரோனா நோய்த் தொற்று தடுப்பு நடவடிக்கைகளைக் கண்காணிக்க  சென்னை உயா் நீதிமன்றம்  தாமாக முன்வந்து வழக்கை விசாரித்து வருகிறது. தற்போது கரோனா நோய்த் தொற்றுப் பரவலின் இரண்டாவது அலை தணிந்து வருகிறது. மருத்துவமனைகளில் ஆரம்பத்தில் படுக்கை உள்ளிட்ட வசதிகள் குறைவாக இருந்தன. தற்போது அந்த வசதிகள் மேம்படுத்தப்பட்டுள்ளன. சிகிச்சை இல்லாமல் கரோனா நோய்த் தொற்றுப் பாதித்தவா்கள் உயிரிழந்தனா் என இதுவரை எந்தப் புகாரும் வரவில்லை’ எனக்கூறி வழக்கை முடித்து வைத்து உத்தரவிட்டனா்.