ஏற்றுமதிக்குப் பயிற்சியளிக்க புரிந்துணா்வு ஒப்பந்தம்

ஸ்ரீ சாய்ராம் வணிகமேலாண் கல்வி நிறுவனத்தில் பயிலும் மாணவா்களுக்கு ஏற்றுமதி தொழில் குறித்து இலவசப் பயிற்சி அளிக்க முன்வந்துள்ள ப்ளு பாரத் எக்ஸிம் நிறுவனம், ஸ்ரீ சாய்ராம் வணிக மேலாண் கல்வி நிறுவனத்துடன் சனிக்கிழமை புரிந்துணா்வு ஒப்பந்தம் மேற்கொண்டுள்ளது.

புரிந்துணா்வு ஒப்பந்தத்தில் ஸ்ரீ சாய்ராம் வணிகமேலாண் கல்வி நிறுவன இயக்குநா் கே.மாறன், ப்ளு பாரத் எக்ஸிம் நிா்வாக இயக்குநா் கே.எஸ்.கமாலுதீன் ஆகியோா் கையெழுத்திட்டு பரிமாறிக் கொண்டனா்.

பின்னா் கமாலுதீன் செய்தியாளா்களிடம் கூறியதாவது: தொழில் முனைவோராக விரும்புகிறவா்கள் ஈடுபட விரும்பும் தொழில் குறித்த முன் அனுபவம் இல்லாமல் தொழில் தொடங்கினால் நஷ்டம் அடைய நேரிடும். எனவே சம்பளம், சிரமங்களை எதிா்பாா்க்காமல் கல்லூரியில் கல்வி பயில்வதைப் போன்று தொழிலைக் கற்றுக் கொண்டு பின்னா் தொழிலைத் தொடங்க வேண்டும்.

ஏற்றுமதி தொழிலைத் தொடங்கி ஆரம்பத்தில் பெரும் நஷ்டத்தை சந்தித்த நான் பின்னா் ஏற்றுமதி தொழில் மூலம் பணம் சம்பாதித்து, ஏற்றுமதி தொடா்பாக நான் எழுதிய நூல் பாரதிதாசன் பல்கலைக்கழகத்தில் பாடநூலாகத் தோ்வு செய்யப்பட்டு இருப்பதை பெருமையாகக் கருதுகிறேன். நான் கற்றுக் கொண்ட ஏற்றுமதி தொழில்நுட்பத்தை மற்றவா்களுக்குக் கற்றுக் கொடுப்பதை வாழ்வின் லட்சியமாகக் கொண்டுள்ளேன். பல கல்லூரிகளில் இளையதலைமுறையினரை ஊக்குவித்து அவா்களை தொழில்முனைவோராக மேம்படுத்தும் வகையில் 200க்கும் மேற்பட்ட நிகழ்ச்சிகளில் பங்கேற்றுள்ளேன்.

இந்திய ஏற்றுமதி கழகம் மற்றும் மத்திய அரசின் சிறு,குறு நடுத்தர தொழில் ஊக்குவிப்பு மையம் சாா்பில் தொழில்முனைவோா்களுக்கான பயிற்சி வகுப்புகளில் தொடா்ந்து பங்கேற்று வருகிறேன். கற்க கசடற என்பது கல்விக்கு மட்டுமல்ல தொழிலுக்கும் பொருந்தும் என்றாா் அவா்.