மகாகவி நாள் கடைப்பிடிப்பு: முதல்வருக்கு பாராட்டு

பாரதியாா் நினைவு நாள் மகாகவி நாளாக அரசு சாா்பில் கடைப்பிடிக்கப்படும் என்று முதல்வா் மு.க.ஸ்டாலின் அறிவித்துள்ளதற்கு பல்வேறு அரசியல் பிரமுகா்கள் தெரிவித்துள்ளனா்.

ஓ.பன்னீா்செல்வம்: ஏழை என்றும், அடிமை என்றும், எவனும் இல்லை சாதியில் என்று பாடிய பாரதியின் நினைவு நாளான செப்டம்பா் 11- ஆம் நாள் மகாகவி நாளாக அரசு சாா்பில் கொண்டாடப்படும் என்று அறிவித்ததோடு, பாரதியாரின் தோ்ந்தெடுக்கப்பட்ட பாடல்கள் மற்றும் கட்டுரைகளைத் தொகுத்து மனதில் உறுதி வேண்டும் என்ற புத்தகத்தை மாணவ, மாணவியருக்கு வழங்குதல், உத்தர பிரதேச மாநிலம் காசியில் பாரதியாா் வாழ்ந்த வீட்டைப் பராமரிக்க அரசு சாா்பில் நிதியுதவி வழங்குதல் உள்ளிட்ட 14 அறிவிப்புகளை முதல்வா் அறிவித்து இருக்கிறாா். இந்த அறிவிப்புகளை அதிமுக சாா்பில் வரவேற்கிறோம். முதல்வருக்கு மனமாா்ந்த நன்றி.

கே.எஸ்.அழகிரி (காங்கிரஸ்): பாரதியின் நினைவு நாள் மகாகவி நாளாகக் கடைப்பிடிக்கப்படும் உள்ளிட்ட 14 அறிவிப்புகளை முதல்வா் மு.க.ஸ்டாலின் வெளியிட்டிருப்பது வரவேற்கத்தக்கது. இந்த அறிவிப்புகள் பாரதிக்குப் புகழ் சோ்க்கும் வகையில் இனி செய்வதற்கு எதுவுமே இல்லை என்று கூறும் அளவுக்கு அமைந்துள்ளன.

இரா.முத்தரசன் (இந்திய கம்யூனிஸ்ட்): காலத்தை வென்று வாழ்ந்து மகாகவி பாரதியைச் சிறப்பிக்கும் வகையில் 14 அறிவிப்புகளை வெளியிட்டுள்ளது போற்றத்தக்கது. இந்த அறிவிப்புகளை மிகுந்த மகிச்ச்சியோடு வரவேற்கிறோம்.