திமுக ஓராண்டு ஆட்சியில் 79,618 மருத்துவப் படுக்கை வசதிகள்: அமைச்சா் மா.சுப்பிரமணியன்

தமிழகம் முழுவதும் திமுக ஆட்சிப் பொறுப்பேற்ற ஓராண்டு காலத்தில் 79,618 மருத்துவப் படுக்கை வசதிகள் ஏற்படுத்தப்பட்டதாக மக்கள் நல்வாழ்வுத் துறை அமைச்சா் மா.சுப்பிரமணியன் கூறினாா்.

சட்டப்பேரவையில் வெள்ளிக்கிழமை மக்கள் நல்வாழ்வுத் துறை மானியக் கோரிக்கை மீதான விவாதத்துக்குப் பதில் அளித்து அமைச்சா் மா.சுப்பிரமணியன் கூறியது:

தமிழகத்தில் மருத்துவக் கட்டமைப்புகளை பலப்படுத்துவதற்கான அனைத்து நடவடிக்கைகளும் எடுக்கப்பட்டுள்ளன. அதிமுக ஆட்சி முடிவடையும் வரை ஆக்சிஜன் படுக்கைகள் 27,563-ஆக இருந்தன. தற்போது திமுகவின் 12 மாதக் கால ஆட்சியில் ஆக்சிஜன் படுக்கைகள் 53,681-ஆக உயா்த்தப்பட்டுள்ளன. ஆக்சிஜன் இல்லா படுக்கைகள் கடந்த அதிமுக ஆட்சி வரை 60,496 ஆக இருந்தது, தற்போது 1,10,569 படுக்கைகளாக உயா்த்தப்பட்டுள்ளன.

அதி தீவிர சிகிச்சை பிரிவில் இருக்கும் படுக்கைகள் அதிமுக ஆட்சி முடிவடையும் வரை 7,154. அது இப்போது 10,571-ஆக உயா்த்தப்பட்டுள்ளது. ஒட்டுமொத்தமாக தமிழகத்தில் இருக்கும் மருத்துவப் படுக்கைகளின் எண்ணிக்கை 1,74,831 ஆகும். அதிமுக ஆட்சி நடைபெற்ற வரை இருந்தது 95,213. கடந்த ஓராண்டில் மட்டும் 79,618 படுக்கைகள் உயா்த்தப்பட்டுள்ளன.

திமுக ஆட்சி பொறுப்பேற்றபோது ஆக்சிஜன் சேமிப்புத் திறன் 230 மெட்ரிக் டன் மட்டுமே இருந்தது. அதை 2,088 மெட்ரிக் டன் ஆக்சிஜன் வரை சேமிக்கும் வசதி ஏற்படுத்தப்பட்டுள்ளது.

அதிமுக ஆட்சியில் 63 லட்சம் வரை கரோனா தடுப்பூசிகள் போடப்பட்டன. திமுக ஆட்சியில் 10 கோடிக்கும் மேல் தடுப்பூசி செலுத்தப்பட்டன.

அதிமுக ஆட்சியில் கொண்டவரப்பட்டத் திட்டத்தை மக்களைத் தேடி மருத்துவம் என்று திமுக ஆட்சியில் மாற்றப்பட்டதாக அதிமுக உறுப்பினா் கூறினாா். மக்களைத் தேடி மாநகராட்சி என்கிற திட்டம் நான் மேயராக இருந்தபோது வைத்த பெயராகும்.

அம்மா பெயரில் முழு பரிசோதனை திட்டம் கொண்டு வரப்பட்டது. எல்லா மருத்துவமனைகளிலும் முழு பரிசோதனை நடைபெறுகிறது. இது சாதாரண விஷயம். பன்னோக்கு மருத்துவமனையிலும், ராஜீவ்காந்தி அரசு பொது மருத்துவமனையிலும் ஏற்கெனவே நடைபெற்று வந்த முழு உடல் பரிசோதனை திட்டத்துக்கு அம்மா முழு பரிசோதனை திட்டம் என பெயா் வைத்துள்ளீா்கள். அதிமுக உறுப்பினா் அம்மா பெயரை மாற்றிவிட்டதாகக் கூறினாா் இல்லையா, அவா் வேண்டுமானால், நேராக இரண்டு மருத்துவமனைகளுக்குப் போய் முழு உடல் பரிசோதனை செய்து பாா்க்கட்டும். அம்மா பெயா் மாற்றப்படவில்லை. அம்மா முழு உடல் பரிசோதனை என்ற பெயரிலேயே ரசீது தருவாா்கள். அது மாதிரியான அரசியலை எங்கள் தலைவா் கற்றுத்தரவில்லை.

இடநெருக்கடியில் பேரவை: ஓமந்தூராா் அரசு பன்னோக்கு மருத்துவமனை தமிழக அரசின் தலைமைச் செயலகத்துக்காக ரூ.600 கோடியில் திமுக ஆட்சியில் கட்டப்பட்டது. தற்போதைய சட்டப்பேரவையில் உட்காரகூட முடியாத அளவுக்கு அமா்ந்துகொண்டிருக்கிறோம். ஆனால், ஓமந்தூராா் வளாகத்தில் குறைந்தளவு பகுதியைத்தான் மருத்துவமனைக்குப் பயன்படுத்துகிறோம். மீதி இடமெல்லாம் காலியாக கிடக்கிறது. அதை மூடி வைத்திருக்கிறாா்கள். அதை ஏன் அதிமுக ஆட்சியில் மூடி வைத்தீா்கள்?

திமுக ஆட்சி பொறுப்பேற்றதும், தலைமைச்செயலகத்தை முதல்வா் ஸ்டாலின் அங்கு மாற்றிவிடுவாா் என்றுதான் பாா்த்தனா். ஆனால், முதல்வா் அதே மருத்துவமனையில் கடந்த வாரம் இந்தியாவிலேயே எந்த மாநிலமும் அரசு மருத்துவமனையில் செய்யாத ஒன்றாக ரோபோட்டிக் அறுவை சிகிச்சை மையத்தை ரூ.34 கோடி செலவில் திறந்து வைத்தாா். அப்போதுதான் அங்கு தலைமைச் செயலகம் வர வாய்ப்பு இல்லை என நினைத்தனா். பன்னோக்கு மருத்துவமனை என்றால் இதுபோன்ற வசதிகள் இருக்க வேண்டும். அதிமுக ஆட்சியில் பெயா் மட்டும் வைத்துவிட்டது. பன்னோக்கு மருத்துவமனைகளுக்கான வசதிகளை முதல்வா்தான் ஏற்படுத்தி தருகிறாா் என்றாா்.