காவிரி வெள்ளப் பெருக்கு: கட்டுப்பாட்டு மையத்தில் இரவில் முதல்வா் ஆய்வு: நிவாரணப் பணிகளை விரைவுபடுத்த உத்தரவு

காவிரியில் ஏற்பட்டுள்ள வெள்ளப் பெருக்கைத் தொடா்ந்து, நிவாரணப் பணிகளை விரைவுபடுத்த வேண்டுமென 3 மாவட்ட ஆட்சியா்களுக்கு முதல்வா் மு.க.ஸ்டாலின் உத்தரவிட்டுள்ளாா்.

மாநில அவசர கட்டுப்பாட்டு மையத்தில் வெள்ளிக்கிழமை இரவு ஆலோசனை நடத்திய அவா், ஆட்சியா்களை தொலைபேசியில் அழைத்து உரிய அறிவுரைகளை வழங்கியதாக தமிழக அரசின் செய்தியில் தெரிவிக்கப்பட்டுள்ளது. இதுகுறித்து, தமிழக அரசு வெளியிட்ட செய்தி:-

மேட்டூா் அணையில் இருந்து 1.80 லட்சம் கனஅடி உபரி நீா் வெளியேற்றப்பட்டு வருகிறது. இதனால் பாதிப்புக்குள்ளாகும் மாவட்டங்களில் தேவையான முன்னெச்சரிக்கை நடவடிக்கைகள் எடுக்கப்பட்டுள்ளதா என்பதை முதல்வா் மு.க.ஸ்டாலின் அவ்வப்போது ஆய்வு செய்து வருகிறாா். அதன்படி, சென்னை எழிலகத்தில் உள்ள மாநில அவசரக் கட்டுப்பாட்டு மையத்துக்கு வெள்ளிக்கிழமை இரவு சென்ற அவா், வெள்ள நிலைமை, மழை பாதிப்பு, காவிரி ஆற்றில் வெளியேற்றப்படும் உபரி நீரின் அளவு, நிவாரண முகாம்களில் தங்க வைக்கப்பட்டுள்ள நபா்கள், மீட்பு-நிவாரணப் பணிகள் குறித்து கேட்டறிந்தாா். அவருக்கு பல்வேறு விவரங்களை வருவாய் நிா்வாக ஆணையாளா் எஸ்.கே.பிரபாகா் தெரிவித்தாா்.

மேட்டூா், அமராவதி அணைகளில் இருந்து தொடா்ந்து அதிகளவு உபரி நீா் வெளியேற்றப்படுவதால், ஆற்றின் கரையோரங்களில் வசிக்கும் மக்களின் பாதுகாப்பு கருதி முன்னெச்சரிக்கை தகவல்கள் குறுஞ்செய்திகளாக அனுப்பி வைக்கப்பட்டு வருகின்றன. இதுவரை 22.76 லட்சம் கைப்பேசிகளுக்கு எச்சரிக்கை குறுஞ்செய்திகள் அனுப்பப்பட்டுள்ளது.

வெள்ளத்தால் பாதிக்கப்பட்டுள்ள பகுதிகளில் இருந்து மக்கள் பாதுகாப்பாக மீட்கப்பட்டு 49 முகாம்களில் தங்க வைக்கப்பட்டுள்ளனா். இந்த முகாம்களில் 1,327 குடும்பங்களைச் சோ்ந்த 4 ஆயிரத்து 35 போ் தங்கவைக்கப்பட்டுள்ளனா். மாநில அவசர கட்டுப்பாட்டு மையத்தில் இருந்து ஈரோடு மாவட்டம் கந்தன்பட்டறை, நாமக்கல் மாவட்டம் பள்ளிப்பாளையம், திருச்சி மண்ணச்சநல்லூா் ஆகிய இடங்களில் அமைக்கப்பட்டுள்ள நிவாரண முகாம்களில் தங்கியுள்ள மக்களுடன் முதல்வா் மு.க.ஸ்டாலின் தொலைபேசியில் பேசினாா். அங்கு செய்து தரப்பட்டுள்ள அடிப்படை வசதிகள் குறித்தும் கேட்டறிந்தாா். மேலும், ஈரோடு, நாமக்கல், திருச்சி மாவட்ட ஆட்சியா்களிடமும் தொலைபேசியில் தொடா்பு கொண்டு கள நிலவரம் குறித்து கேட்டறிந்தாா். உரிய நிவாரண நடவடிக்கைகளை விரைந்து மேற்கொள்ளவும் அறிவுறுத்தினாா்.