திராவிட முன்னேற்றக் கழகத்தின் நிறுவனரும் முன்னாள் முதல்வருமான அண்ணாதுரையின் நினைவு நாளையொட்டி, அவரது நினைவிடத்தில் முதல்வர் மு.க.ஸ்டாலின் வியாழக்கிழமை மரியாதை செலுத்தினார்.
ஆண்டுதோறும் அண்ணா நினைவு நாளன்று, வாலஜா சாலையிலிருந்து அண்ணா நினைவிடத்திற்கு ஆயிரக்கணக்கான திமுக தொண்டர்களுடன் பேரணியாக சென்று மரியாதை செலுத்துவது வழக்கம்.
ஆனால், கரோனா காரணமாக இந்தாண்டு பேரணி ரத்து செய்யப்பட்டு நேரடியாக மெரினாவில் உள்ள அண்ணா நினைவிடத்திற்கு சென்று முதல்வர் மு.க.ஸ்டாலின் மரியாதை செலுத்தினார்.
இந்த நிகழ்வில், அமைச்சர்கள் துரைமுருகன், சேகர் பாபு, மா. சுப்பிரமணியன், எம்.எல்.ஏ.க்கள், கட்சியின் மாவட்டச் செயலாளர்கள் என பலர் கலந்து கொண்டனர்.
முன்னதாக, கரோனா பரவல் காரணமாக அண்ணா நினைவு நாளையொட்டி கோயில்களில் நடைபெறும் அன்னதான நிகழ்வு ரத்து செய்யப்பட்டது குறிப்பிடத்தக்கது.