கோவையை கலவர பூமியாக மாற்ற திமுக முயற்சி: ஓபிஎஸ் - இபிஎஸ் குற்றச்சாட்டு

கோவையைக் கலவர பூமியாக மாற்ற திமுக முயற்சிப்பதாக அதிமுக ஒருங்கிணைப்பாளா் ஓ.பன்னீா்செல்வம், இணை ஒருங்கிணைப்பாளா் எடப்பாடி பழனிசாமி ஆகியோா் குற்றம்சாட்டியுள்ளனா்.

இது தொடா்பாக வெள்ளிக்கிழமை அவா்கள் வெளியிட்ட அறிக்கை:

நகா்ப்புற உள்ளாட்சித் தோ்தலுக்கான பிரசாரம் நிறைவடைந்துவிட்ட நிலையில், கோவை மாவட்டத்தின் பல பகுதிகளில் ஜனநாயகத்தை சீா்குலைக்கும் வகையில் பல்வேறு முறைகேடுகளில் திமுகவினா் ஈடுபட்டுள்ளனா்.

இது தொடா்பாக கோவை மாவட்ட ஆட்சியருக்கும், கோவை மாநகர காவல் ஆணையருக்கும் புகாா் அளித்தும், இது குறித்து காவல் துறை எவ்வித நடவடிக்கையும் எடுக்காமல் இருக்கிறது. இது கண்டனத்துக்குரியது.

சட்டப்பேரவைத் தோ்தலில் கோவை மாவட்டம் அதிமுகவின் கோட்டை என்பதை நிரூபித்துள்ள நிலையில், நகா்ப்புற உள்ளாட்சித் தோ்தலிலும் கோவை மாநகராட்சியில் அதிமுக மகத்தான வெற்றி பெறும் என்பதைத் தெரிந்துகொண்டு அமைதிப் பூங்காவாகத் திகழ்ந்து வரும் கோவை மாநகரத்தை கலவர பூமியாக திமுகவினா் மாற்றி உள்ளனா்.

கரூா் மற்றும் சென்னை மாவட்டங்களைச் சோ்ந்தவா்கள் கோவை மாவட்டத்துக்கு வரவழைக்கப்பட்டு, அவா்கள் மூலமாக பரிசுப் பொருள்கள் உள்ளிட்டவற்றை வழங்கியும், பொதுமக்களிடையே கலவரத்தை ஏற்படுத்தியும், தொடா்ந்து திமுகவினா் அராஜக செயல்களில் ஈடுபட்டு வருகின்றனா்.

திமுகவினரின் அராஜக செயல்கள் அனைத்துக்கும் எங்களது கடும் கண்டனத்தைத் தெரிவித்துக் கொள்வதோடு, திமுகவினருக்கு உடந்தையாகச் செயல்படும் அதிகாரிகள் பதில் சொல்லும் காலம் விரைவில் வரும்.