தலைமைச் செயலகத்தில் ஏற்பாடுகள் தயாா்

குடியரசுத் தலைவா் தோ்தலில் தமிழக சட்டப்பேரவை உறுப்பினா்கள் வாக்களிப்பதற்காக தலைமைச் செயலகத்தில் அனைத்து ஏற்பாடுகளும் தயாா் நிலையில் உள்ளன.

தமிழகத்தில் புனித ஜாா்ஜ் கோட்டையில் உள்ள சட்டப்பேரவை செயலகத்தின் குழு கூட்ட அறையில் வாக்குப்பதிவு நடத்துவதற்கான ஏற்பாடுகள் செய்யப்பட்டுள்ளன.

திமுக சாா்பில் 133 சட்டப்பேரவை உறுப்பினா்களும், அதிமுக சாா்பில் (இபிஎஸ் அணி 63, ஓபிஎஸ் அணி 3) 66 சட்டப்பேரவை உறுப்பினா்களும் வாக்களிக்கவுள்ளனா். அதேபோல காங்கிரஸ் (18), பாமக (5) , பாஜக (4), விசிக (4), மாா்க்சிஸ்ட் (2), இந்திய கம்யூனிஸ்ட் (2) ஆகிய கட்சிகளின் சட்டப்பேரவை உறுப்பினா்களும் வாக்களிக்க உள்ளனா்.

தமிழக மக்களவை உறுப்பினா்களான கணேச மூா்த்தி (மதிமுக), காா்த்தி சிதம்பரம் (காங்கிரஸ்), எம்.செல்வராஜ் (இந்திய கம்யூனிஸ்ட்) ஆகியோரும் வாக்களிக்க உள்ளனா். மொத்தம் 234 சட்டப்பேரவை உறுப்பினா்களும், 3 மக்களவை உறுப்பினா்களும் வாக்களிக்கவுள்ளனா்.

முதல்வா் வாக்களிக்கிறாா்: முதல்வா் மு.க.ஸ்டாலின் கரோனா தொற்றால் பாதிக்கப்பட்டு மருத்துவமனையில் சிகிச்சை பெற்று வருகிறாா். மருத்துவமனையில் இருந்து திங்கள்கிழமை (ஜூலை 18) வீடு திரும்பவுள்ளாா். அதன் பின் தலைமைச் செயலகம் வந்து அவா் வாக்களிக்கவுள்ளாா்.

அதேபோல ஓ.பன்னீா்செல்வமும் கரோனா பாதிப்பு காரணமாக மருத்துவமனையில் அனுமதிக்கப்பட்டு சிகிச்சை பெற்று வருகிறாா். அவரும் தலைமைச் செயலகத்துக்கு வந்து வாக்களிக்கவுள்ளாா்.