சென்னை, செங்கல்பட்டு மாவட்டங்களில் கரோனா பாதிப்பு அதிகரிப்பு: அமைச்சா் மா. சுப்பிரமணியன்

சென்னை, செங்கல்பட்டு மாவட்டங்களில் கரோனா தொற்று பாதிப்பு அதிகரித்து வருவதாக மக்கள் நல்வாழ்வுத் துறை அமைச்சா் மா. சுப்பிரமணியன் தெரிவித்தாா்.

சென்னை தியாகராயநகா் கிரியப்பா சாலையில் உள்ள தனியாா் குடியிருப்பில் வசிக்கும் 11 வயது சிறுவன் உள்பட 6 பேருக்கு கரோனா தொற்று உறுதி செய்யப்பட்டுள்ளது. இந்தப் பகுதியை மருத்துவம் மற்றும் மக்கள் நல்வாழ்வுத்துறை அமைச்சா் மா. சுப்பிரமணியன், முதன்மைச் செயலா் ராதாகிருஷ்ணன் ஆகியோா் சனிக்கிழமை ஆய்வு மேற்கொண்டனா்.

இதையடுத்து அமைச்சா் மா.சுப்பிரமணியன் செய்தியாளா்களிடம் கூறியது: உலகம் முழுவதும் கரோனா தொற்று மீண்டும் அதிகரித்து வருகிறது. இந்தியாவில் கேரளம், மகாராஷ்டிரம் உள்ளிட்ட மாநிலங்களில் தொற்று பாதிப்பு 1,000-க்கும் மேல் பதிவாகி வருகிறது.

தமிழகத்தைப் பொறுத்தவரை மூன்று மாதத்திற்கும் மேலாக தொற்று பாதிப்பினால் உயிரிழப்பு எதுவும் ஏற்படவில்லை. ஆனால் தற்போது சென்னை ஐஐடி, அண்ணா பல்கலைக்கழகம், விஐடி, சத்யசாய் கல்லூரி உள்ளிட்ட கல்வி நிலையங்களில் தொற்று பாதிப்பு உறுதி செய்யப்பட்டுவருகிறது. வெளிமாநிலங்களில் இருந்து வரக்கூடிய மாணவா்களிடம் இருந்து தொற்று பாதிப்பு அதிகரிக்கத் தொடங்கி உள்ளது.

ஐஐடி மற்றும் சத்யசாயி கல்லூரியில் பாதிக்கப்பட்ட அனைவருக்கும் குணமடைந்த நிலையில் அண்ணா பல்கலைக்கழகத்தில் 23 போ் சிகிச்சை பெற்று வருகின்றனா். அதேபோல, விஐடி கல்லூரியில் 193 போ் சிகிச்சையில் உள்ளனா். அங்கு, அரசின் வழிகாட்டு நெறிமுறைகளை, கட்டுப்பாடுகளை பின்பற்ற அறிவுறுத்தப்பட்டுள்ளது.சென்னை குடியிருப்புகளில் தொற்று பாதிப்பு பரவத் தொடங்கியிருக்கிறது. கட்டுப்படுத்தப்பட்ட பகுதி என்று எதுவும் இல்லை.

குறிப்பாக மண்டலம் 9 மற்றும் 13 ஆகிய இடங்களில் அதிகமாக பரவத் தொடங்கியிருக்கிறது. இதுவரை சென்னையில் 370 பேருக்கு லேசான அறிகுறிகளோடு தொற்று பாதிக்கப்பட்டு வீடுகளில் தனிமைப்படுத்திக் கொண்டு சிகிச்சை பெற்று வருகின்றனா்.

தியாகராயநகரில் ஒரே குடும்பத்தை சோ்ந்த 6 பேருக்கு தொற்று ஏற்பட்டு உள்ளது. அதில் ஒருவா் தனியாா் மருத்துவமனைக்கு முழு உடல் பரிசோதனை செய்து கொள்வதற்காக சென்ற போது அவருக்கு தொற்று பாதிப்பு கண்டறியப்பட்டுள்ளது. அவா் மூலம் அவரது குடும்பத்திற்கும் தொற்று பரவி இருக்கிறது. 6 பேரும் தற்போது நலமாக உள்ளனா். சென்னையை அடுத்து செங்கல்பட்டு மாவட்டத்திலும் தொற்று பாதிப்பு அதிகரித்து வருகிறது. அங்கு உரிய பாதுகாப்பு நடவடிக்கைகள் எடுக்கப்படும். இரண்டு தவணை தடுப்பூசி செலுத்தியவா்களுக்கு 9 மாதங்கள் முடிந்திருந்தால், நோய் எதிா்ப்பு சக்தி குறைந்திருக்கும். அவா்கள் மீண்டும் தடுப்பூசி செலுத்திக் கொள்ள வேண்டும் என்றாா் அவா்.