தமிழக சட்டம்-ஒழுங்கு: முதல்வா் ஆலோசனை

தமிழ்நாட்டில் சட்டம்-ஒழுங்கு நிலைமை குறித்து தலைமைச் செயலாளா் உள்ளிட்ட அதிகாரிகளுடன் முதல்வா் மு.க.ஸ்டாலின் சனிக்கிழமை ஆலோசனை நடத்தினாா்.

மாநிலத்தில் சட்டம்-ஒழுங்கு நிலைமை குறித்து பல்வேறு விமா்சனங்கள் எழுந்து வரும் நிலையில், முதல்வா் முக்கியமான இந்த ஆலோசனைக் கூட்டத்தை நடத்தியுள்ளாா்.

தலைமைச் செயலகத்தில் நடைபெற்ற ஆலோசனைக் கூட்டத்தில் தலைமைச் செயலாளா் வெ.இறையன்பு, உள்துறை கூடுதல் தலைமைச் செயலாளா் எஸ்.கே.பிரபாகா், காவல் துறை தலைமை இயக்குநா் செ.சைலேந்திர பாபு, சென்னை பெருநகர காவல் ஆணையாளா் சங்கா் ஜிவால், ‘முதல்வரின் முகவரி’ சிறப்பு அலுவலா் ஷில்பா பிரபாகா் சதீஷ், தமிழ்நாடு மின் ஆளுமை முகமையின் ஆலோசகா் பி.டபிள்யூ.சி.டேவிதாா், முதல்வரின் செயலாளா்கள் த.உதயச்சந்திரன், உமாநாத், சண்முகம், அனுஜாா்ஜ் உள்ளிட்ட பலரும் கலந்து கொண்டனா்.

சட்டம்-ஒழுங்கை மேம்படுத்த மேலும் எடுக்கப்பட வேண்டிய நடவடிக்கைகள், முன்னெச்சரிக்கையாகக் கிடைக்கும் தகவல்களை வைத்து அசம்பாவித சம்பவங்களைத் தடுப்பது உள்ளிட்ட பல்வேறு முக்கிய அம்சங்கள் குறித்து இந்த கூட்டத்தில் விவாதிக்கப்பட்டதாகத் தெரிகிறது. மேலும், குற்றச் சம்பவங்களைத் தடுப்பதற்கான பல்வேறு ஆலோசனைகளை முதல்வா் மு.க.ஸ்டாலின் வழங்கியதாகவும் கூறப்படுகிறது.