திருக்கோயில் வழிபாடு சாா்ந்த ஓலைச் சுவடிகள், அரிய நூல்களை பொதுமக்கள் வழங்கலாம்:அறநிலையத் துறை தகவல்

திருக்கோயில்கள் மற்றும் வழிபாடுகள் சாா்ந்த ஓலைச் சுவடிகள், மறுபதிப்பில்லாத அரிய நூல்கள் ஆகியவற்றை பொதுமக்கள் அந்தந்தப் பகுதிகளில் உள்ள பிரதான திருக்கோயில்களுக்கு வழங்கலாம் என அறநிலையத் துறை சாா்பில் தெரிவிக்கப்பட்டுள்ளது.

இது குறித்து அறநிலையத் துறை வெள்ளிக்கிழமை வெளியிட்ட அறிவிப்பு: இந்து சமய அறநிலையத்துறையில் ஆன்மிக பதிப்பகம் தொடங்கும் பணிகள் தீவிரமாக நடைபெற்று வருகின்றன.

இந்து அறநிலையத்துறையின் கட்டுப்பாட்டில் உள்ள திருக்கோயில்களில் வரலாறு, கட்டடக் கலை, பக்தி இலக்கியங்கள் உள்ளிட்ட செந்தமிழ் இலக்கிய நூல்கள் வெளியிடுவதற்கும், திருக்கோயில்களில் தலபுராணம், தலவரலாறு போன்றவை புதிய வடிவமைப்பில் வெளியிடவும், திருக்கோயில்கள் மற்றும் திருமடங்களால் வெளியிடப்பட்ட அரிய நூல்கள் மறுமதிப்பு செய்யவும் திட்டமிடப்பட்டுள்ளது.

மேலும், திருக்கோயில்களின் ஆகம நூல்களை வெளியிடவும், ஆவணப்படுத்தவும் அரசால் முடிவு செய்யப்பட்டு இந்து சமய அறநிலையத்துறையின் வாயிலாக இந்தப் பணிகள் மேற்கொள்ளப்படும் என்று அறிவிப்பு வெளியிடப்பட்டுள்ளது.

திருக்கோயில்களிலும் மடங்களிலும் கிடைக்கப்பெறும் அரிய ஓலைச் சுவடிகள் மற்றும் அரிய வகை பக்தி நூல்கள் பாதுகாப்பதற்கான நடவடிக்கைகள் மேற்கொள்ளப்பட்டு வருகின்றன.

திருக்கோயில்கள் மற்றும் வழிபாடுகள் சாா்ந்த ஓலைச் சுவடிகள் மற்றும் மறுபதிப்பில்லாத அரிய நூல்கள் பொதுமக்களிடம் இருந்தாலும் அதை வழங்கலாம். தங்களிடமுள்ள பிரதிகளை அந்தந்த பகுதி பிரதான திருக்கோயில்களிலோ, தலைமையிடத்திலோ வழங்கலாம். தங்கள் வழங்கியதற்கான ஒப்புதலோடு பெற்றக்கொள்ளப்படும். அதை பிரதி எடுத்துக் கொண்டு மூலப்பிரதி அளித்தவா்களிடமே மென்பிரதியோடு (நா்ச்ற் இா்ல்ஹ்) ஒப்படைக்கப்படும். வழங்கியவா் குறித்த குறிப்புகளும் நூல்களில் இடம்பெறும். கோயில்களின் வரலாறு, மரபு, பண்பாடு, தமிழ் மொழி தொடா்பான நூல்கள் திருக்கோயில்களில் புத்தக நிலையங்களில் விற்பனைக்கு வைக்கப்படும் என அதில் தெரிவிக்கப்பட்டுள்ளது.