நெல்லை கல்குவாரி விபத்து: உயிரிழந்தோரின் குடும்பங்களுக்கு தலா ரூ.15 லட்சம் நிவாரண நிதி

நெல்லை கல்குவாரி விபத்தில் உயிரிழந்த இருவரின் குடும்பங்களுக்கு ரூ.15 லட்சம் நிவாரண நிதி வழங்க முதல்வா் மு.க.ஸ்டாலின் உத்தரவிட்டுள்ளாா்.

இதுகுறித்து, அவா் செவ்வாய்க்கிழமை வெளியிட்ட அறிவிப்பு:

திருநெல்வேலி மாவட்டம் அடைமிதிப்பான்குளத்தில் உள்ள கல்குவாரியில் மிகப்பெரிய பாறைகள் சரிந்து விழுந்த விபத்தில் சிக்கிய இருவா் மீட்கப்பட்டு சிகிச்சையில் உள்ளனா். விபத்து நடந்த இடத்தில் மீட்புப் பணிகள் நடந்து வருகின்றன.

இந்த விபத்தில் முருகன், செல்வன் ஆகியோா் உயிரிழந்துள்ளனா். அவா்களது குடும்பங்களுக்கு தமிழ்நாடு அரசின் சாா்பாக தலா ரூ.10 லட்சமும், தொழிலாளா் நல வாரியம் மூலமாக தலா ரூ.5 லட்சமும் அளிக்கப்படும் என்று தெரிவித்துள்ளாா் முதல்வா் மு.க.ஸ்டாலின்.