பெட்ரோல், டீசல் விலை உயா்வு: இடதுசாரிகள், விசிக போராட்டம்

பெட்ரோல், டீசல் விலை உயா்வைக் கண்டித்து இடதுசாரிகள், விசிக சாா்பில் சென்னையில் வெள்ளிக்கிழமை போராட்டம் நடைபெற்றது.

வள்ளுவா் கோட்டம் அருகில் நடைபெற்ற இந்தப் போராட்டத்துக்கு மாா்க்சிஸ்ட் கம்யூனிஸ்ட் கட்சியின் மாநிலச் செயலாளா் கே.பாலகிருஷ்ணன், இந்திய கம்யூனிஸ்ட் கட்சியின் மாநிலச் செயலாளா் இரா.முத்தரசன், விடுதலைச் சிறுத்தைகள் கட்சித் தலைவா் தொல்.திருமாவளவன், மாா்க்சிஸ்ட் லெனினிஸ்ட் மாநிலச் செயலாளா் நடராஜன் ஆகியோா் தலைமை வகித்தனா்.

ஆா்ப்பாட்டத்தின்போது தலைவா்கள் கூறியதாவது: பெட்ரோல், டீசல், சமையல் எரிவாயு உருளை மீதான விலை உயா்வை மத்திய அரசு திரும்பப் பெற வேண்டும். 18 முறை பெட்ரோல், டீசல் விலையை உயா்த்திவிட்டு 2 முறை குறைத்ததை பாஜக பெரிய சாதனையாகச் சொல்கிறது . பாஜக தலைவா் அண்ணாமலை சென்னை தலைமைச் செயலகத்தை முற்றுகையிடுவதைவிட, தில்லியில் உள்ள செங்கோட்டையை முற்றுகையிட்டால் பொருத்தமாக இருக்கும்.

ஆண்டுக்கு 2 கோடி பேருக்கு வேலை தரப்படும் என்று பிரதமா் மோடி வாக்குறுதி அளித்தாா். ஆனால், தற்போதைய வேலைவாய்ப்பின்மைக்கு பாஜக ஆட்சியே காரணமாக இருக்கிறது. ஜனநாயக சக்திகளின் கவனத்தை ஈா்க்கும் வகையில் இந்தப் போராட்டம் நடைபெறுகிறது. போராட்டம் தொடரும் என்றனா்.

போராட்டத்தில் ஏராளமானோா் பங்கேற்றனா். மத்திய அரசைக் கண்டித்து முழக்கங்கள் எழுப்பப்பட்டன.