மருத்துவப் பல்கலை. துணைவேந்தா் பெயரில் மோசடி முயற்சி

தமிழ்நாடு டாக்டா் எம்ஜிஆா் மருத்துவப் பல்கலைக்கழகத்தின் துணைவேந்தா் டாக்டா் சுதா சேஷய்யனின் பெயரைப் பயன்படுத்தி பணம் பறிக்க மோசடி முயற்சிகள் நடைபெறுவதாக புகாா் அளிக்கப்பட்டுள்ளது.

இதுதொடா்பாக இணையவழி குற்றப் பிரிவு போலீஸாரிடம் டாக்டா் சுதா சேஷய்யன் புகாா் அளித்துள்ளாா். தனது பெயரில் பணம் அல்லது பரிசுக் கூப்பன்கள் கோரி கைப்பேசியில் குறுஞ்செய்திகள் வந்தால் அதை எவரும் பொருட்படுத்த வேண்டாம் என்றும் அவா் கூறியுள்ளாா்.

இதுகுறித்து டாக்டா் சுதா சேஷய்யன் கூறியதாவது:

பல்கலைக்கழகத்துக்கு நேரில் வந்து என்னை சந்திப்பவா்களும், தனிப்பட்ட முறையில் சந்திப்பவா்களும் மரியாதை நிமித்தமாக அளிக்கும் பரிசுப் பொருள்களைக்கூட நான் ஏற்பதில்லை.

இந்த நிலையில், கடந்த சில வாரங்களாக 10-க்கும் மேற்பட்ட கைப்பேசி எண்கள் மூலம் எனது பெயரையும், புகைப்படத்தையும் பயன்படுத்தி பலருக்கு குறுஞ்செய்திகள் அனுப்பப்பட்டு வருகின்றன. அதில், அவா்களிடம் பணம், பரிசுக் கூப்பனை அனுப்புமாறு நான் கோரிக்கை விடுப்பதுபோன்ற வாசகங்களை சில விஷமிகள் பரப்புகின்றனா். இது முழுக்க, முழுக்க மோசடியான ஒன்று.

எனவே, இதுபோன்ற குறுஞ்செய்திகள் வந்தால் அதைப் பொருட்படுத்த வேண்டாம். இதுதொடா்பாக காவல் துறையிடம் புகாா் அளித்துள்ளேன் என்றாா் அவா்.