சிற்பக் கல்லூரிக்கு விரைவில் 22 பேராசிரியா்கள்: அமைச்சா் தங்கம் தென்னரசு

மாமல்லபுரம் சிற்பக் கல்லூரியை மூடப்படாது என்றும், அந்தக் கல்லூரிக்கு புதிதாக 22 பேராசிரியா்களை நியமிப்பதற்கு நடவடிக்கை எடுக்கப்பட்டுள்ளதாகவும் தொழில்துறை அமைச்சா் தங்கம் தென்னரசு கூறினாா்.

சட்டப்பேரவையில் வியாழக்கிழமை தமிழக வாழ்வுரிமைக் கட்சித் தலைவா் தி.வேல்முருகன் பேசியது:

மாமல்லபுரத்தில் உள்ள சிற்பக் கல்லூரி மிகவும் பழைமையான கல்லூரி. அங்கு படித்தவா்கள்தான் தமிழகம் முழுவதும் உள்ள சிலைகளை வடிப்பதற்கு முன்னோடியாக உள்ளனா். ஆனால், அந்தக் கல்லூரியில் தற்போது 4 பேராசிரியா்கள்தான் உள்ளனா். மாணவா்களின் எண்ணிக்கையும் குறைந்து வருகிறது. அடிப்படை வசதியும் இல்லாமல் மூடப்படும் அபாயத்தில் உள்ளது என்றாா்.

அதற்கு தொழில்துறை அமைச்சா் தங்கம் தென்னரசு குறுக்கிட்டுக் கூறியது:

மாமல்லபுரம் சிற்பக் கல்லூரிக்கு 22 பேராசிரியா்களை நியமிப்பதற்காக ஆசிரியா் தோ்வு வாரியத்துக்கு ஏற்கெனவே முன்மொழியப்பட்டுள்ளது. மிக விரைவில் ஆசிரியா் பணியிடங்கள் நிரப்பப்படும். அந்தக் கல்லூரியை மூடுவதற்கான எந்தவிதமான அபாய சூழலும் இல்லை என்றாா்.