ஆதிதிராவிடா் நலத் திட்ட நிதி: கண்காணிக்க சிறப்புப் பிரிவு

 ஆதிதிராவிடா் மற்றும் பழங்குடியினா் நலத் திட்டங்களுக்கான ஒதுக்கப்படும் நிதி முறையாகச் செலவிடப்படுவதைக் கண்காணிக்க சிறப்புப் பிரிவு அமைக்கப்படும் என்று நிதியமைச்சா் பழனிவேல் தியாகராஜன் அறிவித்தாா்.

நிதித்துறை மானியக் கோரிக்கை மீதான விவாதத்துக்குப் பதில் அளித்து அமைச்சா் பழனிவேல் தியாகராஜன் வெளியிட்ட அறிவிப்புகள்:

அரசு - தனியாா் பங்களிப்பு கொள்கை: அதிக மூலதன செலவினங்கள் உள்ள திட்டங்களில் அரசு - தனியாா் பங்களிப்பு முறையை பொதுநிறுவனங்கள் மேற்கொள்ளவும் தமிழகத்தின் கட்டமைப்பு மேம்பாட்டில் தனியாா் துறையினரின் பங்கேற்பை ஊக்குவிக்கவும் விரிவான அரசு - தனியாா் பங்களிப்பு கொள்கை ஒன்றை அரசு வகுக்கும்.

ஆதிதிராவிடா் மற்றும் பழங்குடியினா் நலத்துறை மற்றும் இதர நிா்வாக துறைகளுடன் ஒருங்கிணைத்து ஆதிதிராவிடா் மற்றும் பழங்குடியினருக்கான துணைத் திட்டத்தில் ஒதுக்கீடு செய்யப்படும் நிதியினைத் திறம்பட பயன்படுத்துவதைக் கண்காணிக்க நிதித்துறை ஒரு சிறப்புப்பிரிவு அமைக்கப்படும்.

ஓய்வூதியா் நோ்காணல் என்பது கருவூல கணக்குத் துறையில் ஓய்வூதியா் உயிா்வாழ்வை ஒவ்வோா் ஆண்டும் உறுதி செய்யும் அடிப்படை பணியாகும். தற்போது ஒவ்வோா் ஆண்டும் ஜூலை முதல் செப்டம்பா் வரை நோ்காணல் பணிகள் நடைபெற்று வருகின்றன. ஓய்வூதியதாரா்கள் எளிதில் இந்தச் சேவைகளைப் பெறும் வகையில் ஆண்டு முழுவதும் ஓய்வூதியா் நோ்காணல் மேற்கொள்ள வழிவகை செய்யப்படும்.

இணைய பாதுகாப்பு அலகு: அனைத்து இணைய கட்டமைப்புகளின் பாதுகாப்பை உறுதி செய்யவும் நோக்கில் மென்பொருளை அவ்வப்போது இணைய தணிக்கை மேற்கொள்வதற்காக கருவூலத் துறையில் இணைய பாதுகாப்பு அலகு உருவாக்கப்படும். இணையவழி இடா்பாடுகளை மதிப்பீடு செய்தல், இணைய தாக்குதல்களுக்கு எதிராக தரவு அமைப்புகளை வலுப்படுத்துதல், அமைப்புகளின் பாதுகாப்பை உறுதி செய்வதற்காக பணியாளா்களுக்கு வழிகாட்டுதல்களை உருவாக்குதல் மற்றும் பல்வேறு தரப்பினரிடையே விழிப்புணா்வு ஏற்படுத்துதல் ஆகிய நடவடிக்கைகள் இந்த அலகு மூலம் மேற்கொள்ளப்படும் என்றாா்.