தமிழகத்தில் 4 நாள்கள் மிதமான மழைக்கு வாய்ப்பு

கிழக்கு திசை காற்றின் மாறுபாடு காரணமாக தமிழகத்தில் புதன்கிழமை (ஜன.4) முதல் 4 நாள்களுக்கு மிதமான மழை பெய்யும் என சென்னை வானிலை மையம் தெரிவித்துள்ளது.

இது குறித்து செவ்வாய்க்கிழமை வெளியிடப்பட்ட அறிவிப்பு: கிழக்கு திசை காற்றின் மாறுபாடு காரணமாக புதன்கிழமை (ஜன.4) முதல் சனிக்கிழமை (ஜன.7) வரை தமிழக கடலோர மாவட்டங்கள், புதுச்சேரி மற்றும் காரைக்கால் பகுதிகளில் ஓரிரு இடங்களில் லேசான முதல் மிதமான மழை பெய்யக்கூடும் .

வடதமிழக உள் மாவட்டங்களில் ஓரிரு இடங்களில் அதிகாலை வேளைகளில் லேசான பனிமூட்டத்துக்கு வாய்ப்பு உள்ளது.

சென்னை மற்றும் புகா் பகுதிகளில் அடுத்த 48 மணி நேரத்துக்கு வானம் ஓரளவு மேக மூட்டத்துடன் காணப்படும் எனத் தெரிவிக்கப்பட்டுள்ளது.