பதவி உயா்வு பெற்ற 46 டி.எஸ்.பி.க்களுக்கு பணியிடம் ஒதுக்கீடு

தமிழக காவல் துறையில் பதவி உயா்வு பெற்ற 46 துணைக் காவல் கண்காணிப்பாளா்களுக்கு (டிஎஸ்பி) புதிய பணியிடம் ஒதுக்கப்பட்டது.

தமிழக காவல் துறையில் கடந்த 1997-ஆம் ஆண்டு காவல் உதவி ஆய்வாளா்களாக பணிக்கு சோ்ந்தவா்கள், 2007-ஆம் ஆண்டு பதவி உயா்வு பெற்று ஆய்வாளா்களாக பணியாற்றினா். இவா்களில் பெரும்பாலானவா்கள் துணைக் காவல் கண்காணிப்பாளா்கள் (டிஎஸ்பி) பதவிக்கு பணி மூப்பு பெற்றனா். இவா்களுக்கு டிஎஸ்பி பதவி உயா்வு வழங்கும்படி தமிழக காவல் துறையின் தலைமை இயக்குநா் சி.சைலேந்திரபாபு அரசுக்கு பரிந்துரை செய்தாா்.

இதை ஏற்று 46 காவல் ஆய்வாளா்களை, டி.எஸ்.பி.க்களாக பதவி உயா்வு அளித்து தமிழக அரசின் உள்துறை முதன்மைச் செயலா் பி.அமுதா, கடந்த மே 30-ஆம் தேதி உத்தரவிட்டாா். பதவி உயா்வு பெற்ற 46 துணைக் காவல் கண்காணிப்பாளா்களுக்கு பணியிடங்களை தமிழக காவல் துறையின் தலைமை இயக்குநா் சி.சைலேந்திரபாபு, ஒதுக்கி வியாழக்கிழமை உத்தரவிட்டாா்.

அதில் முக்கியமாக, மாதவரம் போக்குவரத்துப் புலனாய்வுப் பிரிவு ஆய்வாளா் எஸ்.அகமது அப்துல் காதா், சென்னை பெருநகர காவல் துறையின் நுண்ணறிவுப் பிரிவு உதவி ஆணையராகவும், சென்னை மாம்பலம் காவல் ஆய்வாளா் வடபழனி உதவி ஆணையராகவும், தேனாம்பேட்டை காவல் ஆய்வாளா் ஏ.முரளி பரங்கிமலை உதவி ஆணையராகவும் நியமிக்கப்பட்டுள்ளனா்.

புதிய பணியிடங்களில் நியமிக்கப்பட்ட 46 டி.எஸ்.பி.க்களும், புதிய பொறுப்பை ஓரிரு நாள்களில் ஏற்பாா்கள் என காவல் துறை வட்டாரத்தில் தெரிவிக்கப்பட்டது.