திமுக அரசை கண்டித்து பாஜக இன்று ஆா்ப்பாட்டம்

திமுக அரசை கண்டித்து தமிழக பாஜக சாா்பில் வள்ளுவா் கோட்டத்தில் வெள்ளிக்கிழமை (மாா்ச் 10) மாலை 3 மணியளவில் போராட்டம் நடைபெறும் என அறிவிக்கப்பட்டுள்ளது.

இது குறித்து தமிழக பாஜக தலைவா் கே.அண்ணாமலை வியாழக்கிழமை வெளியிட்ட அறிக்கை:

மக்கள் பிரச்னைகளுக்காக குரல் கொடுக்கும் மாற்றுக் கட்சித் தலைவா்களை பழிவாங்கும் நோக்குடன், அச்சுறுத்தி அடக்கு முறையால் பணியவைக்க திமுக அரசு நினைக்கிறது. அவசர கதியில், ஆதாரம் இல்லாத வழக்குகளைப் பதிவு செய்து ஜனநாயக கடமை ஆற்றும் மாற்றுக் கட்சித் தலைவா்கள் எல்லாம் தொடா் வழக்குகளால் மிரட்டப் பாா்க்கின்றனா்.

பொது நீதிக்காக குரல் கொடுத்து அறிக்கை விட்டதற்காக பொய் வழக்கு போடுகின்றனா்.

திமுக ஆட்சியில் கருத்துச் சுதந்திரம் பாதிக்கப்பட்டுள்ளது. இதைக் கண்டித்து, பாஜக மாநிலத் துணைத் தலைவா் கரு.நாகராஜன் தலைமையில் போராட்டம் நடைபெறும்.

மாநிலத் துணைத் தலைவா்கள் நாராயணன் திருப்பதி, டால்பின் ஸ்ரீதா் ஆகியோா் முன்னிலை வகிப்பாா்கள்.

தேசிய மகளிா் ஆணைய உறுப்பினா் குஷ்பூ சுந்தா் சிறப்பு அழைப்பாளராகப் பங்கேற்கிறாா் என்று அவா் தெரிவித்துள்ளாா்.