குழந்தை பாதுகாக்கும் அம்மனுக்கு சிறப்பு வழிபாடு செய்த கிராமத்தினர்!

சேலம் மாவட்டம் வாழப்பாடி அருகே  குழந்தைகளின் அழுகையை கட்டுப்படுத்தி, நோய் நொடியின்றி பாதுகாத்து வரும் லம்பாடி அம்மனுக்கு 'குழந்தைப்பொங்கல்' வழிபாடு வியாழக்கிழமை நடைபெற்றது. 
குமாரபாளையம் லம்பாடி அம்மன் கோயிலில் குழந்தைப் பொங்கல் சிறப்பு பூஜை வழிபாடு.
குமாரபாளையம் லம்பாடி அம்மன் கோயிலில் குழந்தைப் பொங்கல் சிறப்பு பூஜை வழிபாடு.

வாழப்பாடி: சேலம் மாவட்டம் வாழப்பாடி அருகே  குழந்தைகளின் அழுகையை கட்டுப்படுத்தி, நோய் நொடியின்றி பாதுகாத்து வரும் லம்பாடி அம்மனுக்கு 'குழந்தைப்பொங்கல்' வழிபாடு வியாழக்கிழமை நடைபெற்றது. 

200 ஆண்டுகளுக்கு முன், வாழப்பாடி அருகிலுள்ள ஏ.குமாரபாளையம் மெட்டுக்கல் கிராமம் வழியாக, நிறைமாத கர்ப்பிணியான மலைவாழ் லம்பாடி இனப்பெண் ஒருவர்  இருந்து வந்துள்ளார்.  சொந்த கிராமத்திற்கு செல்ல முடியாத அவர், மெட்டுக்கல் மற்றும் குமாரபாளையம் கிராம எல்லையில் சாலையோரத்தில் இருந்த எட்டி மரத்தடியில் தங்கியுள்ளார். 

கிராம மக்களிடம் அன்பாக பழகிய அவர், கிராமத்திலுள்ள குழந்தைகளை கொஞ்சி மகிழ்ந்துள்ளார். சில தினங்களில் அந்த மரத்தடியிலேயே அழகான குழந்தையை பெற்றெடுத்த அவரும், குழந்தையும் எதிர்பாராத விதமாக உயிரிழந்துள்ளனர். இவரை அம்மனின் வடிவமாகக் கருதிய கிராம மக்கள், இந்த பெண்ணிற்கு எட்டி மரத்தடியிலேயே சிலை வைத்து கோயில் கட்டியுள்ளனர். 

இச்சிலைக்கு அருகில் முறுக்கு மீசை முனியப்பன் சுவாமியையும் பிரதிஷ்டை செய்து எட்டிமரத்து முனியப்பன்,  லம்பாடி அம்மன் கோயில் என்ற பெயரில் வழிபட்டு வருகின்றனர்.

குழந்தை பெற்றெடுத்த தாய்மார்கள் குழந்தையுடன்  சென்று, லம்பாடி அம்மனுக்கு  பொங்கல் வைத்து வழிபட்டால், குழந்தைகளின் அழுகையை அம்மன் கட்டுப்படுத்தி,  நோய்நொடி வராமல் பாதுகாப்பதாகவும், இப்பகுதி மக்களிடையே நம்பிக்கை தொடர்ந்து வருகிறது. இதனால், குமாரபாளையம், மெட்டுக்கல், கல்யாணகிரி, செக்கடிப்பட்டி உள்ளிட்ட சுற்றுப்புற கிராம மக்கள், பிறந்த குழந்தைகளை, எட்டிமரத்தான் லம்பாடி அம்மன் கோயிலுக்கு கொண்டு சென்று 'குழந்தைப்பொங்கல்' வைத்து வழிபாடு நடத்தும் வினோதம் மரபு மாறாமல் இன்றளவும் தொடர்ந்து வருகிறது.

ஏ.குமாரபாளையம், மெட்டுக்கல் கிராமத்தைச் சேர்ந்த  குடும்பத்தினர், குழந்தையை அம்மன் சன்னதியில் படுக்க வைத்து, குழந்தைப் பொங்கல் வைத்து வியாழக்கிழமை சிறப்பு பூஜை வழிபாடு நடத்தி நேர்த்திக்கடன் செலுத்தினர். 

ஏ.குமாரபாளையம் மற்றும் சுற்றுப்புற கிராமங்களில் குழந்தை பெற்ற தம்பதியர், லம்பாடி அம்மனுக்கு குழந்தைப்பொங்கல் வைத்து வழிபட தவறினால், தெய்வக்குற்றம் ஏற்படுமென நம்பிக்கையில் உள்ளனர் என்பது குறிப்பிடதக்கதாகும்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
X
Dinamani
www.dinamani.com