மாவீரன் பட பாணியில் இடிந்து விழும் அரசுக் குடியிருப்பு: கோவையில் பெண் காயம்

கோவை: கோவையில் மாவீரன் படத்தின் பாணியில் இடிந்து விழும் குடிசை மாற்று வாரிய குடியிருப்பில் ஒரு பெண்ணுக்கு காயம் ஏற்பட்டுள்ளது.

தமிழ்நாடு நகர்ப்புற வாழ்விட மேம்பாட்டு வாரியம், தமிழக அரசு மூலமாக நிர்வகிக்கப்படுகின்ற பொதுத் துறை நிறுவனமாகும். இதில் குடிசை பகுதிகளை மேம்படுத்தி அதற்கு மாற்றாக வீடு கட்டி தரப்படுகிறது. இந்த குடிசை மாற்று வாரியம் மூலம் வீடு இல்லாதவர்களுக்கு வீடு என்கிற அடிப்படையில் தமிழகம் முழுவதும் உள்ள நகரங்களில் செயல்படுத்தப்பட்டு வருகிறது.

இதன் அடிப்படையில் கோவை செல்வபுரத்தில் 500-க்கும் மேற்பட்டோருக்கு பயனளிக்கும் விதமாக அடுக்குமாடி குடியிருப்பு கட்டப்பட்டது. கடந்த 2022-ஆம் ஆண்டு டிசம்பர் மாதத்தில் வீடுகள் இல்லாதவர்களுக்கு சலுகை அடிப்படையில் அடுக்குமாடி குடியிருப்பில் வீடுகள் கொடுக்கப்பட்டது.

பல்வேறு அடிப்படை வசதிகளுடன் கட்டப்பட்ட அடுக்குமாடி குடியிருப்பு, தற்போது இடிந்து விழத் துவங்கியுள்ளது. குறிப்பாக உதயகுமார், தங்க ஜோதி தம்பதியினர் கவினேஷ் குமார், ஸ்ரீஹரன் ஆகிய இரு குழந்தைகளுடன் அடுக்கு மாடி குடியிருப்பில் உள்ள வீட்டில் வசித்து வருகின்றனர்.

இதையும் படிக்க | லியோ அதிகாலை காட்சிக்கு அனுமதி இல்லை: உயர்நீதிமன்றம்

இந்த நிலையில் வீட்டின் வெளிப்புறத்தில் உள்ள மாடியின் சுவர், தங்க ஜோதியின் கையின் மேல் இடிந்து விழுந்ததால் பெரும் அசம்பாவிதத்திலிருந்து தப்பித்தார். இதனால் அவர் காயம் அடைந்துள்ளார்.

இந்த குடியிருப்பு பொதுமக்கள் பயன்பாட்டிற்கு கொடுக்கப்பட்டு 10 மாதங்களே ஆகும் நிலையில் மாவீரன் படம் பாணியில் இடிந்து விழும் நிலையில் உள்ளதாக அங்கு வசிக்கும் குடியிருப்பு வாசிகள் தெரிவித்துள்ளனர்.

அடுக்குமாடி குடியிருப்பு சுவற்றில் ஆணி அடித்தாலே இடிந்து விழும் சூழ்நிலை உள்ளதால் அங்கு வசிக்கும் குடியிருப்பு வாசிகள் அச்சத்துடன் வாழ்ந்து வருகின்றனர்.