தமிழ்நாடு சுற்றுலா வழிகாட்டி நெறிமுறைகள் பதிவு திட்டம் அறிமுகம்

தமிழ்நாடு சுற்றுலா வழிகாட்டி நெறிமுறைகள் பதிவு திட்டத்தை சுற்றுலாத் துறை அமைச்சா் கா.ராமச்சந்திரன் அறிமுகப்படுத்திவைத்தாா்.

உலக சுற்றுலா தினத்தை முன்னிட்டு, தமிழ்நாடு சுற்றுலா விருதுகள் - 2023 வழங்கும் விழா சென்னை கலைவாணா் அரங்கில் வியாழக்கிழமை நடைபெற்றது.

இதில் சிறப்பு விருந்தினா்களாக சுற்றுலாத் துறை அமைச்சா் கா.ராமச்சந்திரன், மருத்துவம் மற்றும் மக்கள் நல்வாழ்வுத் துறை அமைச்சா் மா.சுப்பிரமணியன், இந்து சமய அறநிலையத் துறை அமைச்சா் பி.கே.சேகா்பாபு, சிறுபான்மையினா் நலன், வெளிநாடுவாழ் தமிழா் நலத் துறை அமைச்சா் செஞ்சி கே.எஸ்.மஸ்தான் ஆகியோா் பங்கேற்றனா்.

இதில், அமைச்சா் ராமச்சந்திரன் பேசியது:

தமிழக பொருளாதாரத்தை மேம்படுத்துவதில் சுற்றுலாத் துறை முக்கிய பங்காற்றும் வகையில் ‘தமிழ்நாடு சுற்றுலா கொள்கை 2023’ வெளியிடப்பட்டுள்ளது. இதில் சுற்றுலாவுக்கு தொழில் தகுதி கிடைக்கவும், சுற்றுலா தொழில் முனைவோருக்கு ஊக்கத்தொகை, மானியம் வழங்க வழிவகை செய்யப்பட்டுள்ளது.

சுற்றுலா பலன்களை தமிழகத்தின் அனைத்துப் பகுதிகளிலும் ஏற்படுத்தி, திறன் மேம்பாடு, வேலைவாய்ப்பு, தொழில் முனைவோா் அதிக அளவில் உருவாக்கப்படுவாா்கள். மாநில மொத்த உற்பத்தியில் குறைந்தது 12 சதவீதம் சுற்றுலாத் துறை பங்களிப்பு அளிக்கும் வகையில் நடவடிக்கை எடுக்கப்படும்.

சுற்றுலா மற்றும் அதன் துணைத் தொழில்கள் மூலம் தமிழகத்தில் 25 லட்சம் பேருக்கு வேலைவாய்ப்புகள் உருவாக்கப்படும். தமிழ்நாட்டுக்கு வரும் சுற்றுலா பயணிகளுக்கு சிறந்த முறையில் சுற்றுலாத் தலங்களின் சிறப்புகளை எடுத்து இயம்பும் வகையில், தமிழ்நாடு சுற்றுலா வழிகாட்டி நெறிமுறைகள் பதிவு திட்டம்-2023“அறிமுகப்படுத்தப்பட்டுள்ளது.

சுற்றுலாத் தலங்களுக்கு வருகை தருவோருக்கு சிறந்த சேவையை வழங்குவதை ஊக்குவிக்கும் வகையில் சுற்றுலா செயல்பாட்டாளா்களுக்கு விருதுகள் வழங்கப்பட்டுள்ளன.

தமிழ்நாட்டை உலக சுற்றுலா பயணிகளின் விருப்பமான இடமாக உருவாக்க வேண்டும் என்றாா் அவா்.

முன்னதாக, சுற்றுலாத் துறையில் சிறப்பாகச் செயல்பட்டு வரும் 54 சுற்றுலா செயல்பாட்டாளா்களுக்கு தமிழ்நாடு சுற்றுலா விருதுகள் வழங்கப்பட்டன.

தொடா்ந்து, சுற்றுலா வழிகாட்டிகளுக்கான நெறிமுறைகள் பதிவுத் திட்டம் 2023 மற்றும் சுற்றுலா சேவை வழங்குபவா்களுக்கு பதிவுகள் மேற்கொள்வதற்கான திட்டம் தொடங்கி வைக்கப்பட்டது.

தொடா்ந்து ‘வாவ் தமிழ்நாடு’ போட்டியில் வென்ற 24 பேருக்கு அமைச்சா்கள் பரிசு மற்றும் சான்றிதழ் வழங்கினா்.

நிகழ்ச்சியில் தமிழ்நாடு சுற்றுலா வளா்ச்சிக் கழகத் தலைவா் க.மணிவாசன், சுற்றுலா இயக்குநா் சந்தீப் நந்தூரி, தமிழ்நாடு சுற்றுலா வளா்ச்சிக் கழக பொதுமேலாளா் இ.கமலா உள்ளிட்டோா் பங்கேற்றனா்.