நாளை தொடங்குகிறது அக்னி நட்சத்திரம்: வெயில் மீண்டும் அதிகரிக்குமாம்!

கோடைக்காலம் தொடங்கியுள்ள நிலையில், கோடை மழை பெய்து சற்று ஆறுதல் அளித்தாலும், மீண்டும் வெயில் கொளுத்த வாய்ப்புள்ளதாக வானிலை ஆய்வு மையம் தெரிவித்துள்ளது. 

இதுகுறித்து வானிலை ஆய்வு மையம் வெளியிட்ட அறிக்கையில், 

வெயில் மாதங்களான மார்ச் முதல் ஜூன் வரை கோடை வெப்பம் போதும் போதும் என்ற அளவுக்கு அடித்துத்தள்ளும். கத்திரி வெயில் எனப்படும் அக்னி நட்சத்திரம் (மே 4ம் தேதி) முதல் மே 28 ஆம் தேதி வரை நீடிக்க உள்ளது. கத்திரி வெயிலில் வெப்பம் மேலும் அதிகரிக்க வாய்ப்புள்ளது.

தமிழகத்தில் பல நகரங்களில் வெப்பம் அதிகரித்துள்ளது. சென்னை, மதுரை, திருச்சி, வேலூர், திருத்தணி ஆகிய நகரங்களில் அதிகளவில் வெப்பம் பதிவாகியுள்ளது. அக்னி நட்சத்திரம் தொடங்குவதற்கு முன்பே ஒருசில நகரங்களில் வெயில் அளவு 100 டிகிரியை தாண்டியுள்ளது. வழக்கத்தை விட இந்தாண்டு வெப்பநிலை 2 முதல் 4 டிகிரி வரை கூடுதலாக உள்ளது. வெயில் அதிகரிப்பால் குழந்தைகள் முதல் முதியவர்கள் வரை வெளியில் தலைகாட்ட முடியாத நிலையும் ஏற்பட்டது. 

படிக்க: 3 மாவட்டங்களில் இன்று மிகக் கனமழைக்கு வாய்ப்பு

இதற்கிடையில் கடந்த சில நாள்களாக தமிழகத்தின் பல்வேறு பகுதிகளில் கோடை மழையும் பெய்து வருகிறது. வெயிலின் தாக்கம் குறைந்து மழை மேகங்களாக மாறி மக்களின் மனதைக் குளிர்வித்துள்ளது. இதனால் வெப்பத்தின் தாக்கம் பகல் பொழுதில் சற்று குறைந்து காணப்படுகிறது. தமிழகத்தின் பெரும்பாலான மாவட்டங்களில் நல்ல பெய்துள்ளதாக வானிலை ஆய்வு மையம் தெரிவித்துள்ளது. 

ஆனால், இதே நிலை நீடிக்குமா என்றால்... நிச்சயம் இல்லை. மே 4-ம் தேதி(நாளை) முதல் அக்னி நட்சத்திரம் தொடங்குகிறது. இந்நிலையில் மே 5 முதல் மே 7 வரை தமிழ்நாடு, புதுவை மற்றும் காரைக்கால் பகுதிகளில் அதிகபட்ச வெப்பநிலை படிப்படியாக 2 முதல் 4 டிகிரி செல்சியஸ் வரை உயரக்கூடும் எனத் தெரிவித்துள்ளது. 

இனிவரும் நாள்களில் வெப்பத்தின் தாக்கம் அதிகரிக்கும் என்பதால், மக்கள் தேவையின்றி வெளியில் வருவதைத் தவிர்க்குமாறும் அறிவுறுத்தப்பட்டுள்ளது. 

படிக்க: மனோபாலா மறைவு: முதல்வர் ஸ்டாலின் இரங்கல்!