இந்திய அரசியலில் மாற்றத்தை ஏற்படுத்தியவர் கலைஞர்: ராகுல் புகழாரம்

இந்திய அரசியலில் மாற்றத்தை ஏற்படுத்திவர் முன்னாள் முதல்வர் கருணாநிதி என்று காங்கிரஸ் எம்.பி. ராகுல் காந்தி திங்கள்கிழமை தெரிவித்துள்ளார்.

மறைந்த முன்னாள் முதல்வர் கருணாநிதியின் 101-வது பிறந்த நாள் இன்று (ஜூன் 3-ம் தேதி) கொண்டாடப்படுகிறது.

இந்த நிலையில், தில்லியில் உள்ள திமுக அலுவலகத்தில் நடைபெற்ற கருணாநிதிக்கு அஞ்சலி செலுத்தும் நிகழ்வில் காங்கிரஸ் மூத்த தலைவர்கள் சோனியா காந்தி, ராகுல் காந்தி, மார்க்சிஸ்ட் பொதுச் செயலாளர் சீதாராம் யெச்சூரி, இந்திய கம்யூனிஸ்ட் பொதுச் செயலாளர் ராஜா உள்ளிட்ட கூட்டணிக் கட்சித் தலைவர்கள் பங்கேற்றனர்.

கருணாநிதிக்கு அஞ்சலி செலுத்திய பிறகு சோனியா காந்தி செய்தியாளர்களுடன் பேசுகையில், “திமுகவைச் சேர்ந்த எனது நண்பர்களுடன் கலைஞரின் 100-வது ஆண்டு விழாவான புனிதமான நிகழ்ச்சியில் கலந்து கொண்டதில் மகிழ்ச்சியடைகிறேம். அவரை சந்திக்கும் அதிர்ஷ்டம் எனக்கு கிடைத்தது. பல சந்தர்ப்பங்களில், அவரின் அறிவுரைகள் பயனடைந்தது.” எனத் தெரிவித்திருந்தார்.

ராகுல் காந்தி செய்தியாளர்களுடன் பேசுகையில், “தமிழ்நாட்டில் தலைசிறந்த தலைவர் கருணாநிதி. தமிழ் மக்களின் பண்பாட்டை, மொழியை பாதுகாத்தவர்.” எனத் தெரிவித்தார்.

மேலும், கருணாநிதியின் புகைப்படத்துக்கு மரியாதை செலுத்திய படங்களை எக்ஸ் தளத்தில் பகிர்ந்த ராகுல் காந்தி பதிவிட்டதாவது:

“தமிழகத்தின் முன்னாள் முதல்வர் கலைஞர் மு. கருணாநிதியின் பிறந்தநாளில் அவருக்கு நெஞ்சார்ந்த அஞ்சலிகள்.

தமிழ்நாடு மற்றும் இந்திய அரசியலில் மாற்றத்தை ஏற்படுத்திய ஒரு தலைவர். சமூக நீதியை மேம்படுத்துதல், பொருளாதார சமத்துவத்தை முன்னேற்றுதல் மற்றும் தமிழ் மக்களின் மொழி, கலாசாரத்தலுக்காக பாடுபட்டவர்.” எனத் தெரிவித்துள்ளார்.

இந்த நிகழ்வில் திமுக பொருளாளரும் நாடாளுமன்றக் குழுத் தலைவருமான டி.ஆர்.பாலு, திருச்சி சிவா உள்ளிட்ட திமுகவினர் பங்கேற்றனர்.