விழுப்புரத்தில் முதல்வரின் கள ஆய்வுக் கூட்டம் ரத்து!

விழுப்புரம் மாவட்டத்திற்கு கனமழை எச்சரிக்கை விடுக்கப்பட்டுள்ளதையடுத்து விழுப்புரத்தில் முதல்வர் மு.க.ஸ்டாலினின் கள ஆய்வுக் கூட்டம் ரத்து செய்யப்பட்டுள்ளது.

தமிழ்நாட்டின் பல்வேறு மாவட்டங்களில் கனமழை முதல் அதிகனமழை வரை பெய்யக்கூடும் என்ற இந்திய வானிலை ஆய்வு மையத்தின் அறிவிப்பைத் தொடர்ந்து கனமழையினை எதிர்கொள்ள டெல்டா மாவட்டங்களில் மேற்கொள்ளப்பட்டுள்ள முன்னெச்சரிக்கை நடவடிக்கைகள் குறித்து தமிழ்நாடு மு.க. ஸ்டாலின் தலைமையில் தலைமைச் செயலகத்தில் இன்று (26.11.2024) ஆய்வுக் கூட்டம் நடைபெற்றது.

இதில் காணொலிக் காட்சி வாயிலாக மயிலாடுதுறை, விழுப்புரம், நாகப்பட்டினம், திருவாரூர், தஞ்சாவூர் மற்றும் கடலூர் மாவட்ட ஆட்சியர்கள் கலந்து கொண்டனர்.

இதையும் படிக்க | தமிழகத்தில் மரபணு மாற்று மக்காச்சோளம் சட்டவிரோதமாக விற்பனை! முதல்வருக்கு கடிதம்

மழை எச்சரிக்கை விடுக்கப்பட்டுள்ள மாவட்டங்களில் தேவையான முன்னெச்சரிக்கை நடவடிக்கை மேற்கொள்ள அறிவுறுத்தப்பட்டுள்ளது.

மேலும் இதுதொடர்பான இன்றைய அறிவிக்கையில், 'விழுப்புரம் மாவட்டத்தில் கனமழை பெய்யக்கூடும் என்ற இந்திய வானிலை ஆய்வு மையத்தின் அறிவிப்பைத் தொடர்ந்து, 28.11.2024 மற்றும் 29.11.2024 ஆகிய நாட்களில் விழுப்புரத்தில் தமிழ்நாடு முதல்வர் தலைமையில் நடைபெறவிருந்த அரசு நிகழ்ச்சி மற்றும் கள ஆய்வு கூட்டம் ரத்து செய்யப்படுகிறது' எனக் குறிப்பிடப்பட்டுள்ளது.

முதல்வர் மு.க. ஸ்டாலின் மாவட்டந்தோறும் நேரடியாகச் சென்று மக்களைச் சந்தித்து கள ஆய்வு மேற்கொண்டு வருகிறார். கடந்த நவம்பர் 14, 15 தேதிகளில் அரியலூர் - பெரம்பலூர் மாவட்டங்களில் நேரடிக் கள ஆய்வை மேற்கொண்ட அவர், நவம்பர் 28, 29 ஆகிய தேதிகளில் விழுப்புரம் மாவட்டத்திற்குச் செல்லவிருப்பதாகக் கூறியிருந்தது குறிப்பிடத்தக்கது.