சிறந்த நூலகா்கள், நூலகங்களுக்கு விருது: அமைச்சா் அன்பில் மகேஸ் வழங்கினாா்

தமிழத்தில் நிகழாண்டில் சிறப்பாக சேவையாற்றிய நூலகா்கள், நூலகங்கள், வாசகா் வட்டத் தலைவா்களுக்கு பள்ளிக் கல்வித் துறை அமைச்சா் அன்பில் மகேஸ் விருதுகளை வழங்கினாா்.

இந்திய நூலகத் தந்தை எனப் போற்றப்படும் டாக்டா் எஸ்.ஆா்.அரங்கநாதனின் நினைவைப் போற்றும் வகையில் ஆண்டுதோறும் தமிழகத்தில் சிறப்பாக சேவையாற்றும் நூலகா்களுக்கு பொது நூலகத் துறை சாா்பில் விருது”வழங்கப்படுகிறது.

அந்த வகையில் நிகழாண்டில் சிறப்பாக சேவையாற்றிய 40 நூலகா்களுக்கு டாக்டா் எஸ்.ஆா். அரங்கநாதன் விருதை அமைச்சா் அன்பில் மகேஸ் சென்னையில் புதன்கிழமை வழங்கினாா். விருது பெற்ற நூலகா்களுக்கு, சிறப்பு சான்றிதழுடன் 50 கிராம் வெள்ளிப் பதக்கம், ரூ.5,000-க்கான வரைவோலை வழங்கப்பட்டது.

மேலும், மாநில அளவில் அதிக உறுப்பினா்கள், புரவலா்களைச் சோ்த்த மற்றும் அதிக நன்கொடைகள் (தளவாடங்கள், காலிமனைகள், கட்டடங்கள்) பெற்ற மாவட்ட மைய நூலகம், முழுநேர கிளை நூலகம், கிளை நூலகம் மற்றும் ஊா்ப்புற நூலகங்களுக்கு தலா 4 கேடயங்கள் வீதம் 12 கேடயங்கள் வழங்கப்பட்டன. தொடா்ந்து, மாநில அளவில் கட்டடம் கட்டுதல், பராமரிப்புப் பணிகளுக்கு நன்கொடை வழங்கிய நன்கொடையாளா் 3 பேருக்கு சிறப்பு விருது வழங்கப்பட்டது.

பொதுமக்களிடையே குறிப்பாக மாணவா்கள், குழந்தைகள், படித்த இளைஞா்கள், பெண்கள் ஆகியோா்களுக்கிடையே வாசிக்கும் பழக்கத்தை மேம்படுத்த, நூலக முன்னேற்றத்தில் ஆா்வமுள்ளவா்கள், ஆசிரியா்கள், புரவலா்கள், நூலக ஆா்வலா்கள், எழுத்தாளா்கள், சேவை மனப்பான்மை உள்ளவா்கள் ஆகியோரைக் கொண்டு நூலக வளா்ச்சிக்கும், வாசகா்களியிடையே வாசிப்பு பழக்கத்தை மேம்படுத்தவும் இந்த ஆண்டில் மாவட்ட அளவில் சிறப்பாகப் பங்காற்றிய 25 வாசகா் வட்டத் தலைவா்களுக்கு ‘நூலக ஆா்வலா்’ விருது வழங்கப்பட்டது.

புரிந்துணா்வு ஒப்பந்தம்... இதைத் தொடா்ந்து, மாணவா்களுக்கு செயற்கை நுண்ணறிவு (ஏஐ) தொழில்நுட்பம் சாா்ந்த பயிற்சிகள் வழங்குவதற்காக சாம்சங் நிறுவனம்- தமிழக பள்ளிக் கல்வித் துறை இடையே புரிந்துணா்வு ஒப்பந்தம் மேற்கொள்ளப்பட்டது. இதன்மூலம் காஞ்சிபுரம், ராணிப்பேட்டை ஆகிய மாவட்டங்களைச் சாா்ந்த 3,000 மாணவா்கள் பயனடைவாா்கள்.

இந்த விழாவில் பள்ளிக் கல்வித் துறை முதன்மைச் செயலா் பி.சந்திர மோகன், பொது நூலக இயக்குநா் ச.ஜெயந்தி, பள்ளிக் கல்வி இயக்குநா் எஸ். கண்ணப்பன், சென்னை மாவட்ட நூலக ஆணைக் குழுத் தலைவா் கவிஞா் மனுஷ்ய புத்திரன், பொது நூலக இணை இயக்குநா் ச.இளங்கோ சந்திரகுமாா், அண்ணா நூற்றாண்டு நூலக முதன்மை நூலகா் செ.காமாட்சி, சென்னை மாவட்ட நூலக அலுவலா் மு.கவிதா உள்ளிட்டோா் கலந்து கொண்டனா்.