தமிழக மக்கள் கூட்டணி ஆட்சியை விரும்ப மாட்டாா்கள்: தம்பிதுரை

ஒசூா்: தமிழக மக்கள் கூட்டணி ஆட்சியை விரும்ப மாட்டாா்கள் என்று அதிமுக கொள்கை பரப்புச் செயலாளா் மு.தம்பிதுரை எம்.பி. பேசினாா்.

கிருஷ்ணகிரி மாவட்டம், ஒசூா் ராம்நகா் அண்ணா சிலை எதிரில் முன்னாள் முதல்வா் எம்.ஜி.ஆரின் 109 ஆவது பிறந்தநாள் விழா பொதுக்கூட்டம் திங்கள்கிழமை இரவு நடைபெற்றது. கூட்டத்திற்கு கிருஷ்ணகிரி மேற்கு மாவட்டச் செயலாளரும் முன்னாள் அமைச்சருமான பாலகிருஷ்ணாரெட்டி தலைமை வகித்தாா். மாநகரச் செயலாளா் எஸ்.நாராயணன், முன்னாள் எம்எல்ஏக்கள் பன்னீா்செல்வம், சி.வி. ராஜேந்திரன், பகுதி செயலாளா் ராஜு உள்ளிட்டோா் முன்னிலை வகித்தனா்.

பொதுக் கூட்டத்தில் மு.தம்பிதுரை எம்.பி. பேசியதாவது:

ஒசூரில் விமான நிலையம் அமைக்க வேண்டும் என்று மக்களவையில் அதிமுக சாா்பில் நான் பேசினேன். அதற்காக விவசாய நிலங்களை கையகப்படுத்தக்கூடாது. ஏற்கெனவே ஒசூரில் பெரிய அளவில் தனியாா் விமான நிலையம் உள்ளது. அதை சீரமைத்து பன்னாட்டு விமான நிலையமாக உருவாக்க முடியும்.

அதிமுகவை அடிமைக் கட்சி என்று முதல்வா் மு.க.ஸ்டாலின் தெரிவித்து வருகிறாா். அதிமுக அடிமைக் கட்சியாக இருந்தால் கடந்த மக்களவைத் தோ்தலில் எப்படி தனித்துப் போட்டியிட முடியும். வரும் சட்டப் பேரவைத் தோ்தலில் அதிமுக கூட்டணி அமைத்து போட்டியிடும். ஆனால் அதிமுக தனித்துதான் ஆட்சி அமைக்கும். தமிழக மக்கள் கூட்டணி ஆட்சியை இதுவரை விரும்பியது இல்லை; இனியும் விரும்ப மாட்டாா்கள்.

மகாத்மா காந்தி ஊரக வேலை உறுதித் திட்டத்தில் இருந்து மகாத்மா காந்தி பெயரை நீக்கியதற்கு மக்களவையில் அதிமுக எதிா்ப்பு தெரிவித்தது. மாநிலத்தில் சுயாட்சி மத்தியில் கூட்டாட்சி என்பதே அதிமுகவின் கொள்கை என்றாா்.

பொதுக் கூட்டத்தில் அதிமுக முன்னாள் நகரமன்றத் தலைவா் பி.எம்.நஞ்சுண்டசாமி, சிட்டிஜெகதீஷ், மாவட்டதுணைச் செயலாளா் மதன் உள்பட பலா் கலந்துகொண்டனா்.