புளியங்குடி அருகே 17 பவுன் நகை திருட்டு வழக்கில் வேலூரைச் சோ்ந்தவா் கைது

தென்காசி மாவட்டம், புளியங்குடி அருகே 17 பவுன் தங்க நகைகள் திருடப்பட்ட வழக்கில், வேலூா் மாவட்டத்தைச் சோ்ந்தவரை போலீஸாா் திங்கள்கிழமை கைது செய்தனா்.

புளியங்குடி அருகே டி.என். புதுக்குடி, கற்பக வீதி, தெற்குத் தெருவைச் சோ்ந்தவா் முத்துக்குமாா் (40). இவா் தனியாா் நிதி நிறுவனத்தில் பணியாற்றி வருகிறாா். அவரது மனைவி சுதா (34), வடநத்தம்பட்டி பள்ளியில் ஆசிரியராக பணியாற்றி வருகிறாா்.

இருவரும் செப். 22ஆம் தேதி காலை வேலைக்குச் சென்றுவிட்டனா். மாலையில் முத்துகுமாா் வீட்டிற்கு வந்தபோது வீட்டில் இருந்த பீரோ உடைக்கப்பட்டு 17 பவுன் தங்க நகைகள் திருடப்பட்டிருந்தது தெரிய வந்தது.

இதுகுறித்து, புளியங்குடி போலீஸாா் வழக்குப் பதிந்து, விசாரித்து வந்தனா். மேலும், புளியங்குடி டிஎஸ்பி நமச்சிவாயம் தலைமையில், காவல் ஆய்வாளா் ஆடிவேல், உதவி ஆய்வாளா் தீபன்குமாா் உள்ளிட்ட போலீஸாா் அடங்கிய குழுவினா் பல்வேறு சிசிடிவி பதிவுகளைக் கைப்பற்றி விசாரணை மேற்கொண்டனா்.

இந்நிலையில், தென்காசி-மதுரை தேசிய நெடுஞ்சாலையில் போலீஸாா் திங்கள்கிழமை வாகனத் தணிக்கையில் ஈடுபட்டிருந்தபோது, இருசக்கர வாகனத்தில் வந்தவரைப் பிடித்து விசாரித்தனா்.

அவா் வேலூா் மாவட்டம், அணைக்கட்டு பகுதியைச் சோ்ந்த தங்கவேலு மகன் மணிகண்டன் (42) என்பதும், முத்துகுமாா் வீட்டில் நகைகளைத் திருடிய இவருக்கு வட மாவட்டங்களில் 80-க்கும் மேற்பட்ட திருட்டு, கொள்ளை வழக்குகளில் தொடா்பு இருப்பதும் தெரிய வந்தது.

தொடா்ந்து, அவரைக் கைது செய்த போலீஸாா், அவரிடமிருந்து நகைகள், இருசக்கர வாகனத்தை பறிமுதல் செய்தனா்.