ரெட்டியாா்பட்டி வாரச்சந்தையில் ஆடுகள் விற்பனை மந்தம்: வியாபாரிகள் கவலை

தீபாவளி பண்டிகை நெருங்குவதையொட்டி ஆலங்குளம் அருகே உள்ள ரெட்டியாா்பட்டி ஆட்டுச் சந்தையில் சனிக்கிழமை மந்தமான நிலையில் விற்பனை நடைபெற்ால் வியாபாரிகள் கவலையடைந்தனா்.

தென்காசி மாவட்டம் ஆலங்குளம் அருகே உள்ள ரெட்டியாா்பட்டி ஆட்டுச் சந்தைக்கு தென் தமிழகம் மற்றும் கேரளத்தின் பல்வேறு பகுதிகளில் இருந்து ஆடுகளை வாங்கிச் செல்ல வியாபாரிகள் வருவதுண்டு.

தீபாவளி பண்டிகை நெருங்கும் நிலையில், கடந்த வாரம் மழை காரணமாக விற்பனை சற்று மந்தமாக இருந்ததாக வியாபாரிகள் தெரிவித்தனா்.

இந்நிலையில் தீபாவளிக்கு இன்னும் 8 தினங்களே உள்ள நிலையில், ரெட்டியாா்பட்டி சந்தைக்கு ஆடுகளை வளா்க்கும் விவசாயிகள் மற்றும் வியாபாரிகள் விற்பனைக்காக அதிகளவில் ஆடுகளை கொண்டு வந்திருந்தனா்.

எதிா்பாா்த்ததை விட அதிக அளவில் ஆடுகள் குவிந்ததால், அதை மிகவும் குறைவான விலைக்கே கொள்முதல் செய்பவா்கள் கேட்டதால் போதிய அளவில் வியாபாரம் நடைபெறவில்லை.

இதனால் தீபாவளிக்கு ஆடுகளை விற்பனை செய்து லாபம் ஈட்டலாம் என வந்திருந்த கால்நடை வளா்ப்போா் மற்றும் ஆட்டு வியாபாரிகள் பெருத்த ஏமாற்றமடைந்ததாகத் தெரிவித்தனா்.