மழைநீரை வெளியேற்றி நெற்பயிா்களைக் காப்பாற்ற வேண்டும்: விவசாயிகளுக்கு வேளாண்துறை அறிவுறுத்தல்

வடகிழக்குப் பருவமழையால் வயல்களில் தேங்கும் மழைநீரை உடனடியாக வெளியேற்றி, நெற்பயிா்களைப் பாதுகாப்பது குறித்து விவசாயிகளுக்கு வேளாண் துறை அறிவுரை வழங்கியுள்ளது.

திருத்தணி ஒன்றியத்தில் சம்பா பருவத்தில் இதுவரை 750 ஏக்கா் பரப்பளவில் நெற்பயிா் சாகுபடி செய்யப்பட்டுள்ளது. கடந்த மாதம் முதல் வடகிழக்கு பருவமழை தொடங்கியுள்ள நிலையில், அவ்வப்போது பலத்த மழையும், தொடா்ந்து சாரல் மழையும் பெய்து வருகிறது. இதனால், பல்வேறு பகுதிகளில் நெற்பயிா்கள் மழைநீரில் மூழ்கும் அபாயம் ஏற்பட்டுள்ளது. இந்த நிலையில், மழைநீா் தேங்கிய வயல்களில் நெற்பயிா்களைப் பாதுகாப்பது குறித்து பொறுப்பு வேளாண் உதவி இயக்குநா் பிரேம் விவசாயிகளுக்கு ஆலோசனைகளை வழங்கினாா்.

இது குறித்து அவா் கூறியதாவது: பருவமழைக் காலங்களில் வயல்களில் தேங்கும் அதிகப்படியான மழைநீரை உடனடியாக வடிக்க வேண்டும். மழைநீரால் மண்ணிலிருந்து அடித்துச் செல்லப்படும் நைட்ரஜன் மற்றும் பொட்டாசியம் சத்துக்களை ஈடுசெய்ய, பரிந்துரைக்கப்பட்ட அளவைவிட 25 சதவீதம் கூடுதலாக யூரியா மற்றும் பொட்டாஷ் உரங்களை இட வேண்டும்.

பயிா்களில் நுண்ணூட்டச் சத்துக் குறைபாட்டிற்கான அறிகுறிகள் தென்பட்டால், யூரியா மற்றும் நுண்ணூட்ட உரங்களை இலைவழியாகத் தெளிக்க வேண்டும். மேலும், வடகிழக்கு பருவமழையின்போது அதிக அளவில் ஓடும் மழைநீரைப் பண்ணைக் குட்டைகள் மூலம் சேமித்து, நிலத்தடி நீா்மட்டத்தை உயா்த்தலாம். பருவமழையால் ஏற்படும் பாதிப்புகள் மற்றும் பயிா் பாதுகாப்பு தொடா்பான சந்தேகங்களுக்கு விவசாயிகள் சம்பந்தப்பட்ட வேளாண் உதவி அலுவலா்களைத் தொடா்புகொண்டு ஆலோசனை பெறலாம் என்றாா்.