ரூ. 1.5 லட்சம் கோடியில் விரிவாக்க பணிகள்: இந்தியன் ஆயில் திட்டம்

ரூ. 1.5 லட்சம் கோடி முதலீட்டில் பல்வேறு விரிவாக்கப் பணிகளை மேற்கொள்ளவிருப்பதாக இந்தியன் ஆயில் நிறுவனம் தெரிவித்துள்ளது.

அந்நிறுவனத்தின் தலைவர் பி. அசோக் செய்தியாளர்களிடம் தெரிவித்ததாவது:

தற்போது நாட்டின் பல்வேறு இடங்களில் செயல்பட்டு வரும் இந்தியன் ஆயில் நிறுவனத்துக்கு சொந்தமான சுத்திகரிப்பு ஆலைகளில் மேம்பாட்டுப் பணிகள் மேற்கொள்ளப்படும். குஜராத்தில் உள்ள ஆலையின் தற்போதைய உற்பத்தித் திறன் 1.37 கோடி டன்னாகும். இதனை 1.8 கோடி டன் ஆக அதிகரிக்கத் திட்டமிடப்பட்டுள்ளது. மதுரா ஆலையின் திறன் 80 லட்சம் டன் ஆக அதிகரிக்கப்படும். மேலும், பானிபட் ஆலையின் திறன் தற்போதைய 1.5 கோடி டன்னிலிருந்து 2 கோடி டன்னாக அதிகரிக்கப்படும். பிகார் மாநிலம், பரெளனி ஆலை விரிவாக்கம் செய்யப்படும்.

ஒடிசா மாநிலம், பாரதீப்பில் புதிய ஆலை உருவாகி வருகிறது. 1.1 கோடி டன் சுத்திகரிப்புத் திறனுள்ள அந்த ஆலை வரும் நவம்பர் மாதம் முதல் இயங்கத் தொடங்கும். அடுத்த 5 ஆண்டுகளில் இந்தியன் ஆயில் ரூ. 1.5 லட்சம் கோடி முதலீட்டில் பல்வேறு விரிவாக்கப் பணிகளை மேற்கொள்ளவிருக்கிறது. தற்போது செயல்பட்டு வரும் ஆலைகளின் மேம்பாட்டுக்காக ரூ. 50,000 கோடி செலவிடப்பட உள்ளது என்று அவர் கூறினார்.