பங்குச் சந்தைகளில் திடீர் உற்சாகம்: சென்செக்ஸ் 224 புள்ளிகள் அதிகரிப்பு

இந்தியப் பங்குச் சந்தைகளில் தொடர்ந்து ஆறு நாள்களாக மந்த நிலையில் இருந்த வர்த்தகம் வியாழக்கிழமை திடீர் உற்சாகம் கண்டது.
அமெரிக்க டாலருக்கு நிகரான ரூபாய் மதிப்பு 72-ஆக சரிவடைந்த நிலையிலும், ஆரோக்கிய பராமரிப்பு, எரிசக்தி, மின்சார துறைகளைப் பங்குகளை வாங்குவதில் முதலீட்டாளர்கள் மிகுந்த ஆர்வம் காட்டினர். 
தொடர்ந்து ஆறு நாள்களாக முன்னணி நிறுவனப் பங்குகள் விலை குறைந்து வந்த சந்தர்ப்பத்தை முதலீட்டாளர்கள் சிறந்த வாய்ப்பாக பயன்படுத்திக் கொண்டனர். ரிலையன்ஸ் இண்டஸ்ட்ரீஸ் பங்கின் விலை 2.80 சதவீதமும், பவர் கிரிட் 2.21 சதவீதமும், கோல் இந்தியா 2.05 சதவீதமும், ஸன் பார்மா பங்கின் விலை 2 சதவீதமும் உயர்ந்தன.
மும்பை பங்குச் சந்தையில் வியாழக்கிழமை நடைபெற்ற வர்த்தகத்தில் சென்செக்ஸ் 224 புள்ளிகள் உயர்ந்து 38,242 புள்ளிகளில் நிலைத்தது. தேசிய பங்குச் சந்தை குறியீட்டெண் நிஃப்டி 59 புள்ளிகள் அதிகரித்து 11,536 புள்ளிகளில் நிலைத்தது.