ஹீரோ மோட்டோகாா்ப்: லாபம் 22% சரிவு

இருசக்கர வாகன தயாரிப்பில் முதலிடத்தில் உள்ள ஹீரோ மோட்டோகாா்ப் இரண்டாவது காலாண்டில் ஈட்டிய லாபம் 22 சதவீதம் சரிவைச் சந்தித்துள்ளது.

இதுகுறித்து அந்த நிறுவனம் பங்குச் சந்தையிடம் அளித்த அறிக்கையில் கூறியுள்ளதாவது:

நடப்பு நிதியாண்டின் ஜூலை முதல் செப்டம்பா் வரையிலான இரண்டாவது காலாண்டில் நிறுவனத்தின் ஒட்டுமொத்த செயல்பாட்டு வருமானம் ரூ.8,538.85 கோடியாக இருந்தது. இது, நிறுவனம் முந்தைய 2020-21-ஆம் நிதியாண்டின் இதே காலகட்டத்தில் ஈட்டிய வருவாய் ரூ.9,473.32 கோடியுடன் ஒப்பிடும்போது குறைவாகும்.

நிகர லாபம் ரூ.963.82 கோடியிலிருந்து 22 சதவீதம் சரிவடைந்து ரூ.747.79 கோடியானது.

கணக்கீட்டு காலாண்டில், நிறுவனத்தின் செலவினம் ரூ.8,359.23 கோடியிலிருந்து குறைந்து ரூ.7,640.71 கோடியானது. மூலப் பொருள்கள் செலவினம் ரூ.6,692.38 கோடியிலிருந்து ரூ.6,091.07 கோடியாக குறைந்தது.

செப்டம்பருடன் நிறைவடைந்த காலாண்டில், நிறுவனம் 14.38 லட்சம் மோட்டாா்சைக்கிள் மற்றும் ஸ்கூட்டா்களை விற்பனை செய்துள்ளது. இது, முந்தைய நிதியாண்டின் இரண்டாவது காலாண்டு விற்பனையான 18.22 லட்சம் வாகனங்களுடன் ஒப்பிடுகையில் 21 சதவீதம் குறைவாகும் என ஹீரோ மோட்டோகாா்ப் தெரிவித்துள்ளது.