ரூ.2,500 கோடி திரட்டிய பரோடா வங்கி

கடன் பத்திரங்களை வெளியிட்டதன் மூலம் ரூ.2,500 கோடி மூலதனம் திரட்டியதாக அரசுக்குச் சொந்தமான பரோடா வங்கி (பிஓபி) தெரிவித்துள்ளது. இது குறித்து வங்கி வெளியிட்டுள்ள அறிக்கையில் தெரிவிக்கப்பட்டுள்ளதாவது: பேசல்-3 விதிகளை நிறைவு செய்யும் 2-ஆம் அடுக்கு கடன் பத்திரங்களை வெளியிட்டதன் மூலம் ரூ.2,500 கோடி மூலதனம் திரட்டப்பட்டுள்ளது. அந்தக் கடன் பத்திரங்களுக்கு ஆண்டுதோறும் 7.57 சதவீதம் ஈவுத் தொகை வழங்கப்படும் என்று அறிக்கையில் குறிப்பிடப்பட்டுள்ளது. கடந்த 2023 டிசம்பருடன் முடிவடைந்த நடப்பு நிதியாண்டின் 3-ஆவது காலாண்டில் பரோடா வங்கியின் நிகர லாபம் 19 சதவீதம் உயா்ந்து ரூ.4,579 கோடியாக உள்ளது. முந்தைய 2022-23-ஆம் நிதியாண்டின் இதே காலாண்டில் வங்கி ரூ.3,853 கோடி நிகர லாபம் ஈட்டியிருந்தது. 2022 அக்டோபா் - டிசம்பா் காலாண்டில் ரூ.27,092 கோடியாக இருந்த வங்கியின் மொத்த வருவாய், நடப்பு நிதியாண்டின் இதே காலாண்டில் ரூ.31,416 கோடியாக அதிகரித்துள்ளது.