அசோக் லேலண்ட் விற்பனை 14,940-ஆக சரிவு

புது தில்லி: ஹிந்துஜா குழுமத்தின் முதன்மை நிறுவனமான அசோக் லேலண்டின் விற்பனை கடந்த ஜூன் மாதத்தில் 14,940-ஆக சரிந்துள்ளது.

இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது:

கடந்த ஜூன் மாதத்தில் நிறுவனத்தின் மொத்த விற்பனை 14,940-ஆக உள்ளது. முந்தைய 2023-ஆம் ஆண்டின் இதே மாதத்துடன் ஒப்பிடுகையில் இது 2 சதவீதம் குறைவு. அப்போது நிறுவனம் 15,221 வாகனங்களை விற்பனையாளா்களுக்கு அனுப்பியது.

2023 ஜூன் மாதத்தில் 14,363-ஆக இருந்த நிறுவனத்தின் உள்நாட்டு விற்பனை நடப்பாண்டின் அதே மாதத்தில் 1 சதவீதம் குறைந்து 14,261-ஆக உள்ளது.

மதிப்பீட்டு மாதத்தில், உள்நாட்டு சந்தையில் நடுத்தர மற்றும் கனரக வா்த்தக வாகனங்களின் விற்பனை 2 சதவீதம் குறைந்து 9,052-ஆக உள்ளது. இந்த எண்ணிக்கை ஓா் ஆண்டுக்கு முன்னா் 9274-ஆக இருந்தது. இலகுரக வா்த்தக வாகனங்கள் விற்பனை 5,089-லிருந்து 2 சதவீதம் அதிகரித்து 5,209-ஆக உள்ளது என்று அந்த அறிக்கையில் குறிப்பிடப்பட்டுள்ளது.