எல்ஐசி நிகர லாபம் ரூ.13,763 கோடியாக உயா்வு

புது தில்லி: கடந்த மாா்ச் காலாண்டில் நாட்டின் மிகப் பெரிய காப்பீட்டு நிறுவனமான இந்திய ஆயுள் காப்பீட்டு நிறுவனத்தின் நிகர லாபம் ரூ.13,763 கோடியாக அதிகரித்துள்ளது.

இது குறித்து நிறுவனம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

2022-23-ஆம் நிதியாண்டின் 4-ஆவது காலாண்டில் நிறுவனத்தின் நிகர லாபம் ரூ.13,428 கோடியாக இருந்தது.

இது, கடந்த 2023-24-ஆம் நிதியாண்டின் இதே காலாண்டில் 2 சதவீதம் அதிகரித்து ரூ.13,763 கோடியாக உள்ளது.

மதிப்பீட்டுக காலாண்டில் நிறுவனத்தின் மொத்த வருவாய் ரூ.2,00,185 கோடியிலிருந்து ரூ.2,50,923 கோடியாக உயா்ந்துள்ளது. பிரீமியம் வருவாய் ரூ.12,811 கோடியிலிருந்து ரூ.13,810 கோடியாக வளா்ச்சியடைந்துள்ளது.

கடந்த 2023-24-ஆம் நிதியாண்டு முழுமைக்கும் நிறுவனம் ரூ.40,676 கோடி நிகர லாபம் ஈட்டியது. முந்தைய 2022-23-ஆம் நிதியாண்டின் நிகர லாபமான ரூ.36,397 கோடியைவிட இது அதிகம்.

மதிப்பீட்டு நிதியாண்டில் நிறுவனத்தின் மொத்த பிரீமியம் வருவாய் ரூ.4,74,005 கோடியிலிருந்து ரூ.4,75,070 கோடியாக உயா்ந்துள்ளது என்று அந்த செய்திக்குறிப்பில் தெரிவிக்கப்பட்டுள்ளது.