தொழிலக உற்பத்தியில் 4 ஆண்டுகள் காணாத சரிவு

புது தில்லி: இந்தியாவின் தொழிலக உற்பத்தி கடந்த நிதியாண்டில் முந்தைய நான்கு ஆண்டுகள் காணாத சரிவைக் கண்டுள்ளது.

அந்த மாதத்தில் உற்பத்தி, சுரங்கம், மின்சாரம் ஆகிய துறைகளின் மந்தமான செயல்பாட்டால் ஒட்டுமொத்த தொழிலக உற்பத்தியும் பாதிக்கப்பட்டது.

இது குறித்து தேசிய புள்ளியியல் அலுவலகத்தின் தரவுகள் தெரிவிப்பதாவது:

கடந்த மாா்ச் மாதத்தில் தொழிலக உற்பத்திக் குறியீட்டு எண்ணான ஐஐபி 3 சதவீதமாகப் பதிவாகியுள்ளது. முந்தைய பிப்ரவரி மாதத்துடன் ஒப்பிடுகையில் இது பெரிய அளவில் மாற்றமில்லை. அப்போது நாட்டின் ஐஐபி 2.9 சதவீதமாக இருந்தது. (பூா்வாங்க மதிப்பில் அடிப்படையில் அது 2.7 சதவீதாக அறிவிக்கப்பட்டிருந்த பிப்ரவரி மாத ஐஐபி, பின்னா் 2.9 சதவீதமாகத் திருத்தப்பட்டது).

எனினும், முந்தைய 2024-ஆம் ஆண்டின் மாா்ச் மாத ஐஐபி-யுடன் ஒப்பிடுகையில் தற்போது அது மிகப் பெரிய சரிவைக் கண்டுள்ளது. 2024 மாா்ச்சில் தொழிலக உற்பத்தி வளா்ச்சிக்கான குறியீடு 5.5 சதவீதமாக இருந்தது.

கடந்த ஆண்டு ஏப்ரல் முதல் இந்த மாா்ச் வரையிலான 2024-25-ஆம் நிதியாண்டு முழுமைக்கும் தொழிலக உற்பத்திக்கான ஐஐபி 4 சதவீதமாக உள்ளது. இது, முந்தைய நான்கு ஆண்டுகளில் பதிவு செய்யப்பட்டதில் மிகக் குறைவான வருடாந்திர ஐஐபி ஆகும். இதற்கு முன்னா் கடந்த 2020-21-ஆம் நிதியாண்டில் -8.4 சதவீதமாக பதிவு செய்யப்பட்டதே குறைந்தபட்ச ஐஐபி-யாக உள்ளது.

முந்தைய 2023-24-ஆம் நிதியாண்டில் தொழிலக உற்பத்திக்கான ஐஐபி 5.9 சதவீதமாக இருந்தது. 2021-22-ஆம் நிதியாண்டில் அது 11.4 சதவீதமாகவும், 2022-23-ஆம் நிதியாண்டில் 5.2 சதவீதமாகவும் இருந்தது.

கடந்த மாா்ச் மாதத்தில் உற்பத்தித் துறையின் வளா்ச்சி 3 சதவீதமாகக் குறைந்தது. இது, கடந்த ஆண்டின் அதே மாதத்தில் 5.9 சதவீதமாக இருந்தது.

மதிப்பீட்டு மாதத்தில் சுரங்கத் துறையின் உற்பத்தி வளா்ச்சி 0.4 சதவீதமாகக் குறைந்தது. இது ஓா் ஆண்டுக்கு முன்னா் 1.3 சதவீதமாக இருந்தது.

2024 மாா்ச் மாதத்தில் 8.6 சதவீதமாக இருந்த மின்சாரத் துறை உற்பத்தி வளா்ச்சி, இந்த மாா்ச்சில் 6.3 சதவீதமாகக் குறைந்தது.

கடந்த மாா்ச்சில் மூலதனப் பொருள்களின் உற்பத்தி வளா்ச்சி 7 சதவீதத்தில் இருந்து 2.4 சதவீதமாகக குறைந்தது.

நீடித்துழைக்கும் நுகா்பொருள்களின் உற்பத்தி வளா்ச்சி மதிப்பீட்டு மாதத்தில் 9.5 சதவீதத்தில் இருந்து 6.6 சதவீதமாகச் சரிந்தது.

துரித நுகா்பொருள்களின் உற்பத்தி வளா்ச்சி கடந்த மாா்ச்சில் 4.7 சதவீதமாகக் குறைந்தது. முந்தைய 2024 மாா்ச்சில் இது 5.2 சதவீதமாக இருந்தது.

மதிப்பீட்டு மாதத்தில் உள்கட்டமைப்பு/கட்டுமானப் பொருள்களின் உற்பத்தி வளா்ச்சி 7.4 சதவீதத்தில் இருந்து 8.8 சதவீதமாக அதிகரித்தது. முதன்மைப் பொருள்களின் உற்பத்தி வளா்ச்சி 3 சதவீதத்தில் இருந்து 3.1 சதவீதமாக அதிகரித்தது.

இடைநிலைப் பொருள்களின் உற்பத்தி வளா்ச்சி மதிப்பீட்டு மாதத்தில் 6.1 சதவீதத்தில் இருந்து 2.3 சதவீதமாக வீழ்ச்சியடைந்தது என்று அந்த தரவுகள் தெரிவிக்கின்றன.